香港，到底有無西灣河站？唔通，呢一切只係香港人嘅「曼德拉效應」？民建聯梁熙一句要爭取西灣河站，除咗令街坊同觀眾O晒嘴，仲爭啲令西灣河「旱災」⋯⋯即係俾人抽乾晒啲水呀！
最「抽得」嘅莫過於改歌高手晴天林，將陳百強嘅《幾分鐘的約會》改成《地下鐵無站嗎》， 「地下鐵無站嗎 要俾西灣河人每日用」、「這平行宇宙 何時市民可接通」⋯⋯可謂句句直線抽擊～
而一向「貼地」嘅日本駐香港領事館「日本知多D」Facebook Page今日就出Post，同大家玩「猜漢字遊戲」，叫人估日文嘅「駅」係咩意思，認為係「馬場」嘅就畀Like、「車站」畀心心、「馬場」畀哈哈、「尺寸」畀嘩，而背景圖仲要用埋西灣河地鐵站⋯⋯雖然「駅」呢個字係咩意思相信好多人都知，但唔少網民都話仍然忍唔住要畀「哈哈」個Post。導演王家衛嘅Fan Page「Wong Kar Wai Anthology」就Po咗張《墮落天使》嘅劇照，話王家衛喺1995年已經成功爭取西灣河地鐵站，等戲中嘅李嘉欣可以順利去觀塘裕民坊幫黎明執房。
其實梁熙喺噚晚都有出片解釋點解話要「爭取」有西灣河站，話佢當時只係諗起佢哋爭取緊嘅「小西灣站」，所以「一時口快講錯」。唔知呢個解釋，大家又接唔接受呢？
