唔好睇Channel 絲平時開朗活潑，其實有個問題困擾咗我好耐，就係長期右邊肩頸痛呀呀呀！ (嗚～講起又feel 到痛）不過好彩，呢排識咗忠醫師，可以俾我全力問佢中醫問題，今次就問下啪骨係咪有用先！
Channel 絲：「其實我間中都有去啪骨，啪完嗰下係爽嘅，但隔一排又要再去，其實啪骨係咪真係有用？同埋係咪啪得返正啲位㗎？」
忠醫師：「整骨有冇用就睇整骨師識唔識、認唔認真啦！一般整骨簡單分兩種方法，一係單純針對關節嘅對位與否，就即係啪骨；二係針對關節唔對位嘅原因去做治療，即係軟手法治療，例如台灣傳過嚟嘅『林氏手法』，通過處理肌肉，甚至係觀察更細微嘅結構同臟腑功能，去達到治療效果。啪骨操作時間短，對比較輕同新起嘅痛症有效，但慢性、長期嘅痛症就爭啲；軟手法治療嘅時間較長，但就可以處理比較難同複雜嘅結構問題。」
Channel 絲：「呢樣嘢係好多女仔都想知嘅，Facebook 間唔中就彈啲啪骨可以小顏、瘦面嘅廣告出嚟，又係咪真係得嘅呢？我都真係好想瘦下面呀～」
忠醫師：「係咪有小顏或修正面形效果呢⋯⋯短期效果係肯定有嘅，但可以keep幾耐就好講技術。因為面部喺頭骨上，所以只要改變到骨架嘅任何方面，其實面部都會有變化。引伸出嚟就係針灸有小顔效果，食藥又有小顔效果，刮痧、推拿、按摩都可以有小顔效果。但係想效果持久，都係要睇返個治療有幾針對你個人面部同頭骨嘅結構問題。」
Channel 絲：「老土都要問下，究竟點樣可以治本地改善肩頸痛或腰骨痛之類嘅問題呢？肩頸痛真係好困擾，嗚～」
忠醫師：「講到治本，其實即係點樣活得健康，而健康同醫好個病係唔同概念嚟嘅。要健康，要靠『養』，必須由日常生活調整身心狀態。開心、放鬆、清淡飲食，加適當運動，要治本就係咁。」
Channel 絲：「開心、放鬆、清淡飲食，加適當運動先係最難喎，哈哈！」
忠醫師：「要香港人放鬆同飲食清淡係難啲嘅⋯⋯不過就痛症嚟講，骨頭係靠肌肉收縮去活動，因此，一切引起肌肉收縮嘅原因都可能造成痛症。所以，喺治療上，係要針對病因去治療，而唔係見痛醫痛，就比較貼近『治本』嘅方向。平時留意返坐姿同工作姿勢等嘅習慣，加上適量運動去keep住肌肉同筋骨嘅柔軟度，都可以減少痛症發作嘅機會同發作時嚴重程度。」
健康資訊由 忠醫診所 提供
見字飲水，見post 即like，祝大家身體健康🕺
見字飲水，見post 即like，祝大家身體健康🕺
