Miss Hunny今日喺Facebook轉載左一條喺寵物公園影嘅群組影片，有隻兔仔俾幾隻狗不停追逐，場面十分驚險，同時作為狗主人同埋兔主人嘅Miss Hunny就提醒各位一定要睇實自己嘅寵物！
片中有幾隻狗不停追住一隻兔仔，而兔仔唔似係喺寵物公園享受緊，反而好似好想逃離幾隻狗嘅追逐。不時仲會聽到兔仔發出一些喘氣嘅聲，有網民就話呢一種聲音只係兔仔非常害怕嘅時候先會發出，可見兔仔應該真係好驚自己被咬！
Miss Hunny打咗一篇長文，就勸喻兔兔主人「去野餐又好去郊遊都好，想放兔仔嘅話記住幾件事：上兔仔繩、做好防虱防蟎（有藥要噴要滴㗎）、確保放兔仔嘅地方冇狗💥」，而「最後一點非常💥非常💥非常💥非常緊要」，因為「首先兔仔喺大自然嘅世界裏面，都係被捕獵嘅植食性動物，狗係肉食性動物，狗仔嘅零食裏面係有兔肉、兔耳，如果嗰隻狗狗有食開，又唔係由細到大同兔仔相處嘅話，你覺得佢聞到兔仔味會覺得係咩？」
佢都強調唔係想公審片入面兔仔同埋狗仔嘅主人，只係希望提醒主人要睇實自己嘅寵物，作為狗主兔主嘅Miss Hunny就話，「狗仔同兔仔係可以相處嘅，但絕對唔係人哋隻狗同自己隻兔！你永遠唔會知人哋隻狗食咩大，可能佢每一餐都係兔肉🤷🏻♀️唔係一句兔仔嘅安危由你負責就冇問題，如果當時真係咁不幸，兔仔比狗仔咬死甚至食咗，你可以負責嘅只有佢嘅身後事，只有危，並冇安，你冇負責到佢嘅幸福、健康」。
對於狗主，「狗仔食咗你隻兔仔如果身體有咩不適，人哋主人要你負責，你又可以點負責？如果你係新手主人，希望你今日之後睇多啲書去學，冇人一出世就識養兔仔，我養第一隻兔仔之前都睇哂幾本書先決定養，你會想帶佢去草地玩都係想佢開心啫，但係而家片尾隱約聽到兔仔尖叫，你知道嗎？兔仔冇聲帶㗎，嗰啲應該唔可以叫做「尖叫聲」，係佢跑得太快太急，加上極度驚慌壓到氣管發出嘅聲，係遇到危險發出嘅嚴重警號，咁可想而知佢去狗公園係玩得係開心定唔開心」。
最後佢就話，「做主人係唔簡單㗎，唔係同佢玩就叫照顧，愛佢、珍惜佢，就令自己成長啦。如果冇做好防虱防蟎，記得去睇獸醫，冇睇醫生唔代表冇病」。
大量網民喺下面留言，有人話「臨尾聽到兔仔尖叫，真係好心痛呀！兔仔只會喺超級超級驚慌嘅時候先會有叫聲🥺」，甚至有人話「兔仔好易會嚇死，見過兩次」。
Channel絲都係兔兔主人，睇到呢條片嘅時候個心真係好唔舒服，有網民都話「😭睇到好想喊，好彩最後冇事」，希望大家可以珍惜自己嘅毛孩🥲🥺💛
