今日fb「的士司機資訊網 Taxi」有的士司機po咗段「乘客發爛渣」車Cam片，司機話：「我見佢攞住花已經開埋門被佢仲要發老皮」。
事緣一位捧住水仙花嘅人兄搭的士，由於司機幫手開門，起初都好客氣咁講「唔該晒司機」。開車前，司機就問咗句：「行邊條隧道吖？」，男乘客就答「行呢條最快啦」，然後開始躁起上嚟反問司機：「你想行邊度吖你話」。
的士司機就解釋有人會因為行西隧或者紅隧而唔滿意，所以先問清楚。男乘客就話：「咪同你講囉！呢度吖嘛！」司機又回：「呢度咩隧道先得架？」結果男乘客就憤而落車。司機同男乘客講ByeBye，話「我唔恨做你啲咁嘅生意呀」。
今次唔少網民留言撐司機，話「問吓都唔得?」、「免事後講數,最好就問清楚,答清楚,好正常啫」，但都有網民認為其實時代廣場去書院道只能行紅隧，司機應有專業判斷，但有人就回覆，「緊係唔好自己揸主意啦，你唔係唔知啲西客可以有幾癲。」
