壽司郎灣仔開海外首間居酒屋 預告以親民價享用創意日本料理

壽司郎近兩年喺香港連開15間分店，但仍經常大排長龍，有食客就會因為拎唔到飛、入座等問題而大鬧壽司郎。不過母公司FOOD & LIFE Companies似乎毋懼呢個情況，繼續喺香港擴大版圖，今個夏天仲會喺灣仔開設海外首間壽司郎居酒屋「杉玉 SUGIDAMA」，仲講明話以大眾化價錢，為顧客提供充滿創意嘅居酒屋料理添！

杉玉 2017年喺日本創立，源於日本傳統釀酒文化，除咗為顧客帶來唔同嘅日本清酒同日本料理，餐廳都加入咗唔少創新玩味元素，希望可以畀客人前所未有嘅全新感官體驗。

睇返杉玉日本網站介紹，大部份料理都係299日圓，日本酒最平299日圓有得飲，午市丼飯最平890日圓有交易，價格都十分親民。