成日話香港係文化沙漠，Channel絲就認為好視乎你用咩角度看待！得閒留意身邊嘅人，可能舞王就喺你左近！
有網民早排喺港鐵站月台，捕捉到呢位陶醉於自己舞蹈世界嘅師兄，戴上漁夫帽、穿起鬆身褲，佢跟住自己嘅節拍開始動起來！拍片者就稱佢為「唔會被等車耽誤既舞者」，仲話好respect（尊重）佢添！ 雖然片段被上載到「香港江湖日報之ON9限定 2.0」，但係有人就留言話「呢啲Post唔係On_ Post黎🙌尊重藝術文化」，而留言都好多正評！
之前Channel C都有轉載到唔少「港鐵舞者」，不過呢位師兄與別不同嘅地方，在於佢冇打擾到其他人，佢只係喺自己一個小空間入面，盡情地跳，令到網民都不得不讚「用一個小範圍，又無搞到人，又跳得唔錯，幾好幾好」，「佢都係用塊玻璃當做練舞室，又唔影響人哋做得幾好👏，溝死女」。背景音樂呢首名曲係拍片者後製加上，都有人讚佢「隻歌又配得幾好😆」。
其實香港一直不缺醉心表演藝術嘅人才，有人就話「只要心中有beat ..任何地方都可以係你既舞台」，雖然講到口臭，但係Channel絲都希望香港各位有夢想嘅人都可以搵到自己嘅一片天，撐你哋！
