早排大家都應該有睇過唔同國家嘅真人尋愛騷，終於等到有香港專屬版喇！杜汶澤嘅「喱騷」早幾日就播出咗《好想大聲說愛你嘅呢》首集，影片上載兩天，曾登上YouTube熱門第13位，而參加者們喺第一集就已經互相大起底！
四位女參加者首先以「睇喼揀仔」嘅方式挑選咗自己第一場Blind Date（蒙眼約會）嘅對象，四對男女各自傾完之後就聚埋一齊開眼罩。四位男士一開眼罩之後，全部都話25歲、讀緊護士嘅黑妹最吸引，不過自認男仔頭嘅黑妹原來有唔少女仔朋友都話佢好似成日收兵！
除低眼罩嘅參加者們大談大家嘅愛情史，而當中都幾多爆炸位！揭開一個信封，入面寫住「12歲打排球破處」，參加者們都諗緊件事係點樣發生嘅時候，28歲嘅Kisa就話打排球時突然間痛一下，就以為自己大姨媽駕到，不過後來又冇流血。佢話之前嘅男朋友有質疑過，不過佢就照直講，男朋友唔信「咁可以點」咁話。
有一個信封就寫住「破過4個處」，風趣嘅Laughing就「自認」係佢，而當女參加者們都表示震驚時，Sam先解畫話係自己。大家就喺度數手指，話Sam一年破一個處，Sam就大爆原來呢四個都係喺中學畢業至大學一年級時發生，而係因為嗰陣同初戀女友分手，就覺得要放縱一下。為咗取得美人歡心，你又可以去到幾盡？Laughing就曾經喺一個台妹身上使咗3年，金額20萬，當中原來係包含機票同埋住宿，不過最後都係唔成事……
網民就表示節目充滿青春氣息，感受到青春之餘，仲可以從中了解到現今世代年青人感受。而身為監製的田蕊妮就話：「第一集免費公開播出後，知道反應不俗。我亦見到很多留言，節目有需要改進的地方，我們亦盡力改進。而有很多觀眾覺得很好看，急不及待想看第二集，我見到這些留言很開心，很開心大家喜歡喱騷製作的節目。」唔知大家又對節目有咩評價呢？
