市民今日（9日）起進入食肆及娛樂場所等須強制嘟「安心出行」後，商台節目《在晴朗的一天出發》主持人透露，政府正諮詢演出業界，日後在紅館演出時，所有表演者、入場人士必須打針才可睇騷；並引述康文署回覆指，考慮適當時候擴大「疫苗氣泡」適用範圍，推動市民接種疫苗，署方亦表示了解相關人士關注。睇返嚟緊紅館演出又已賣飛嘅包括張敬軒《THE NEXT 20 演唱會》及AGA《AGA Gaia Live》，但暫時未知措施會否適用於已售票演出。
香港現場演出及製作行業協會顧問謝嘉豪在同一節目表示，有間接收到業界諮詢，但不清楚措施實施時間，認為應提供豁免期畀已買門票人士。他以周杰倫明年3月舉行嘅紅館演出為例，「買咗飛嘅，突然有呢個條文，但我無打（針）㗎喎！買嗰時無（條文）架喎！咁點樣安撫一啲觀眾呢？」被問到會否建議措施只適用於未開售的演唱會，謝嘉豪亦認同，稱政府應考慮有關方法。
謝嘉豪續說，當局亦要考慮有醫學理由不適合打針人士是否可獲豁免，例長者不適宜打針時，「咁佢以後係咪唔使睇演唱會？」、「紅館都有兒童節目，咁係咪唔睇得呢？」
被問到紅館入場觀眾可達萬人，若逐個檢查是否已打針，執行上會否有困難，謝嘉豪認為檢查並不太困難。他又強調，業界不會因而提早開始售票。
