面對疫情，有人選擇如常生活，與病毒共存，有人就另覓出路轉行賣兩餸飯，而保安局就決定要出Sticker「宣傳」社區隔離設施各項服務，整咗隻叫「方艙俠」嘅嘢。
之前懷疑移民失敗，近日先「大概知道香港人唔慣用踎廁，鍾意用座廁」嘅新任保安局首席助理秘書長謝振中喺Facebook話，有一班叫做「方艙族」嘅人「無畏險阻，毅然走到抗疫最前線，參與方艙嘅拓荒同埋之後照顧患者嘅工作」，而呢班人嚟自「五湖四海，各有所長」、「又無分你我」，講到佢哋「決心守護香港呢個『家』，一齊戰勝『疫』境」咁喎。「大家好！我係方艙俠，喺日後方艙嘅活動同埋營內小區管理嘅通訊中，我都有機會同大家見面，用心為大家服務，亦希望大家繼續支持我哋嘅工作」。
大家又會唔會用呢啲WhatsApp Sticker呢？
