前全國政協常委何柱國，日前擔任商台節目《光明頂》嘉賓，接受陶傑訪問時，連環抨擊前特首林鄭月娥及現任特首李家超，指曾勸諫林鄭月娥切勿推「逃犯條例」修訂，批評她是「人禍」，及聲言李家超不懂經濟，連「制裁」是甚麼都不清楚。何柱國又指責提議港元應該跟美元脫勾的人是「傻」的，因為連中國都手持很多美元資產。
【新聞有價 記者有格 立即訂閱：https://bit.ly/3wGQh7c】
日前商台節目《光明頂》邀請了前全國政協常委何柱國擔任嘉賓，與主持人陶傑討論香港夜市問題，何柱國大潑政府冷水：「香港夜市得個蘭桂坊，唔通其他地方出嚟搞夜市咩？講咩，去做吖，做唔做到先，發春夢呀？」他指香港政府沒有話事權，一切都只是跟隨北京，於是外商陸續離港：「好多外市行都走，因為嗰時covid，以為我（指政府）跟住上面，上面就同我開關，就可以救個經濟，點知上面郁都唔郁，佢自己又唔可以行，鬼佬公司佢要出入自如至可以通處去架。」
他更批評政府並非適合的人才：「你要諗下，你點振興個經濟？喂，你睇下美國嘅財政司，個個都打得嘅，個個大公司大企業裡面出嚟，識得點做，而且商界朋友多，日日可以傾偈，大家幫助大家，個networking好重要…一定要度橋，一定要靠外來幫助，政府雖然有啲人才，但佢哋唔識點做。」
提到美國經濟，及曾有言論指港紙應與美元脫勾，他說：「個個嗰時嗌香港唔好用美元做（掛勾）呀，乜乜嘢呀，講嗰個都傻嘅，諗清楚啲，你睇下我哋偉大嘅祖國，都係揸好多美元資產架，係全世界第二呀。（陶傑：你識嘢嘛）我唔係識嘢呀，嗰啲鍾意擦鞋啫，支持人民幣國際化，國咩啫，阿爺都冇諗住國際化。」
何柱國形容香港今日的形勢是「天災人禍」造成，他表示在2019年反修例運動期間，曾勸時任特首林鄭月娥「收手」：「其實香港本來係一個好好生活，好完美嘅地方，因為香港一向享受一國兩制下面出嚟，但係香港呢幾年有幾個風波，一個係嗰時佔中風波，然之後林鄭月娥搞個反修例（逃犯條例），就整咗一班黑衣人出嚟，搞到香港亂咗，由嗰時開始邊有夜市吖，晚晚通街都係警察，跟住又covid，夜市自然消失。所以香港今日嘅形勢係受到天災同人禍，我講疫情算係天災啦，人禍咪走番去林鄭月娥囉。嗱當時我同佢解釋過，你如果去搞反修例呢個嘢，會引到美國嚟制裁香港，我亦親口同李家超（時任政務司司長）兩個人喺馬會coffee shop講，呢單嘢你勸下阿太，唔好去做，因為將來會影響香港同美國嘅交易，人哋可以制裁你。李家超連制裁佢都唔係幾明，我話佢可以制裁有好多，高科技乜都可以，到時影響到大陸，因為好多高科技都係由香港入大陸，我解釋得好清楚，佢唔係幾明，因為我知道連林鄭月娥都唔係幾明，佢（李家超）係一個專門管保安，佢唔係做生意佢唔會明，所以佢一知半解，所以香港到今日，整出黑衣人暴動，俾外國佬乘機搏你懵，加埋covid，香港絕對傷。」
