今個5月，除咗因為要堂食而要打針嗰啲針外，公共交通工具嘅坐位上面都出現唔少針，大家真係要小心！今日（31日）就有人喺港島82號巴士上面被拮，而今個月總共出現咗4次相似案件……
今日（31日）下午4點幾，一架82號路線嘅新巴由北角碼頭開去小西灣藍灣半島途中，駛到去英皇道625號對開時，車上一名男乘客向車長報稱被座椅上一支針拮親，車長就停車兼報警。
被針刺傷嘅男乘客當時喺北角新光戲院對開巴士站上車，坐喺上層右邊第二排座位，但一坐低就感到臀部一陣刺痛，之後就發現座位上有一支針。警員到場上車了解事件，就見到涉案刺針一度楔喺兩張座椅縫隙之間。
【新聞有價 記者有格 立即訂閱：https://bit.ly/3wGQh7c】
早幾日（25日）荃灣一架68M九巴上，一個男乘客落車後先感到背部刺痛，之後就喺條褲度發現一支針，通知車長報警。警方檢獲一支三厘米嘅針，列作普通襲擊，暫未有人被捕。九巴發言人就話喺座椅上發現縫紉針，會配合警方調查。
再早多幾日，23號朝早有一名8歲男小學生，乘搭43M路線雙層城巴到香港仔返學時，喺下層座椅被一支約5厘米長縫紉針刺傷臀部，需要送院敷治。
另外，月初（6日）下午一架開往大坑勵德邨嘅81路線新巴上面，坐喺下層左邊第二排座位嘅60歲女乘客，背部都被一支約5厘米長嘅針刺傷。
雖然大家都唔知落毒手嘅人有咩居心，仲唔知佢哋係咪「集團式」操作，總之大家搭車坐低前記得要望一望、拎隻手掃一掃張櫈先好坐低呀！
