香港政府頻頻感謝中央，背後有咩代價？有醫護IG大爆，亞洲博覽館內嘅內部臨床管理系統（CMS）介面已變成中文顯示，質疑舉動係為咗遷就「中央援港救兵」，「大家一向喺電腦睇嘅record（紀錄）好快就會見到中文字之餘，仲係用佢地啲大陸terms（術語）。前線同事，你哋準備好要睇中文醫療紀錄未？」
呢個IG收到報料，話「有幾百位大陸醫護，準備入去亞博開工，佢地除咗會照顧病人，仲會用我地醫院管理局一向引以為傲嘅臨床管理系統（CMS）」。有咩特別？報料人就話「呢班工友會有晒account去睇病人資料之餘，最離譜係一向系統用嘅英文介面，將會轉輸入法，容許佢地用中文打字同埋做紀錄」。
仲未夠？原來「電腦仲會有個搜狗程式裝咗，幫佢地將簡體轉繁體字，再儲入我地個醫療電子系統」，所以香港嘅醫護「一向喺電腦睇嘅record（紀錄）好快就會見到中文字之餘，仲係用佢地啲大陸terms（術語），前線同事，你哋準備好要睇中文醫療紀錄未？」
呢個報料人仲擔心香港人將要「準備好接受大陸式治療」，例如係「B超X射線、血常規、打個點滴」。而佢認為最重要嘅嘢，就係香港病人嘅數據，覺得如果「呢啲嘢無人知、無人講」可能會有不堪設想嘅後果……
