九巴上星期六（14日）一班269D巴士因為「盪失路」，最終由巴士迷成功帶路逃出青衣，事件喺網上掀起討論，Channel C報道後，唔少網民都大讚結局好有愛，「巴迷好有型」。事隔兩日，九巴都喺社交平台出po話「係愛呀」。
九巴都講返當時事件，話架269D喺屯門公路上橋嗰陣唔小心行錯路，但全靠一班巴士迷，憑住佢哋強大嘅記憶力，為車長指路，結果成功拯救咗一班「荒失失奇兵」。「大家全程都安靜有耐性咁坐定定喺到，乜都唔駛做，等巴士迷carry🤩九巴仔真係睇到巧感動啊！」九巴又除咗多謝熱心巴士迷嘅support，亦多謝乘客嘅耐同體諒，「巴士迷世一！互助萬歲！」仲hashtag咗「今次唔到你唔服」添！
不過，有網民就覺得始終係巴士司機行錯路，有欠專業，「行錯路做要咁光明正大講出嚟」、「不如好好俾指引車長，行錯咗路點搞好過」，亦有網民話「留返你哋公司無對車長秋後算賬先講」。另有人質疑巴士迷亦帶錯路，「兜咗兩次青衣，你都仲讚佢哋」、「明明青衣西北交匯處已經可以調到頭」。
事發係上星期六下午，有讀者報料指當日於沙田乘搭開往天水圍天富嘅269D，本來經屯門公路上橋入大欖隧道，但行錯路入咗深井，其後更經汀九橋入咗青衣。雖然車長行錯路，但車上乘客都無大吵大鬧，巴士迷就幫手帶路，最終離開青衣。讀者更指如果唔係巴士迷幫助，司機一世都走唔出青衣添！
