近月失業率再次攀升，疫情下一份工都難求，唔好講話一份好工。Facebook專頁「全職獵人」最近就發現，有公司喺求職網站出廣告搵人做私人助理，要處理老闆私人事務同娛樂不特止，仲要間中幫忙按摩！
呢間公司仲要求職者「開郎（朗）健談」同埋「open-minded」，樣貌亦有要求。月薪方面就話有2萬至3萬，但每星期要返5至6日。
小編嘗試用Google搵返呢份求職廣告，但結果搵唔到。不過，呢份工作實際係做啲咩呢，睇嚟都呼之欲出。
個Post出咗後，專頁「中環十一少」就分享，話曾經有位女性朋友畢業後去一間中資公司做主席助理，連月被言語騷擾。之後去北京出差，夜晚返酒店時，老細突然話為咗「方便傾公事」要求酒店打通兩間房，最終女方連夜返港，即時劈炮唔撈。佢話，涉事公司以「未過通知期」為由唔賠錢，最後差啲驚動警方先死死地氣賠double。
