《全民造星II》出身嘅 Phoebus吳啟洋、George（歐鎮灝）同Marco（葉振弘）三為一體組成嘅男子組合P1X3L ，今年初正式簽約環球出道，係樂壇新人之一，成軍冇耐已推出派台歌。佢哋初出道時曾透露以贏「叱咤樂壇生力軍」同歌曲獎為目標，但喺噚日叱咤記者會上都未見3人蹤影，新人獎名單亦榜上無名。
佢哋之後都有喺IG story輪流貼黑畫面，對冇得出席都極為失望，其中Phoebus更表示，「一直也沒有一刻停止過，花光了力氣… 連入場券也無緣…」；George都坦言難受，「我哋都想被認可為今年新人」。Channel絲睇到，隔住個mon都感受到佢哋嗰種灰；想同佢哋講加油，除咗師傅愛你，Channel C都愛你㗎！
噚日《2021年度叱咤樂壇流行榜頒獎典禮》記者會上，大會公佈今年樂壇生力軍競爭激烈，生力軍獎項會由3個變9個，將「叱咤樂壇生力軍男歌手」、「叱咤樂壇生力軍女歌手」及「叱咤樂壇生力軍組合」獎項各設金、銀、銅獎。
而角逐新人獎項嘅名單就包括：MC張天賦、楊樂文（Lokman）、呂爵安（Edan）、曾比特（Mike）、石山街、李妍、惡夢扭蛋、張進翹（Manson）、before the night ends、薛晉寧、梁業（肥仔）、郭嘉駿（193）、張蔓姿、ANSONBEAN、MC $oHo & KidNey、Kayan9896，惟獨唔見P1X3L個名，連叱咤入場券都拎唔到。但睇返叱咤資料，佢哋首歌《Braceless》連續5個星期都有打入「903 專業推介」，最高上過第九位。
P1X3L三子事後都有喺IG story輪流上載黑畫面，流露灰爆心情。Phoebus表示「點解會係咁，一直也沒有一刻停止過，花光力氣，連入場券也無緣」；佢又似憑歌寄意，自彈自唱陳奕迅嘅《我甚麼都沒有》。George都坦言：「當看見一班新人可以同台出席，但偏偏沒有我們，係真係難受……我哋都想被認可為今年新人。」而Marco就話：「我都想嚟㗎。」
唔少網民都戥P1X3L三子慘，仲話「又多一個新人單位俾環球專搞死啦」、「出咗一首歌之後就乜都冇做，只係見ViuTV係咁畀佢哋出鏡先叫有人記得」。不過，環球回覆傳媒時表示，P1X3L因工作撞期而未能出席。另外，同屬環球嘅女歌手AGA（江海迦）同Gin Lee（李幸倪）噚日都缺席記者會，環球只得陳凱詠同新人曾比特出席。
P1X3L出道以來雖然歌曲唔多，不過都經常喺電視劇集同綜藝節目見到佢哋，好似之前全體有份拍嘅《大海男兒》，而家播緊、Marco part兩位女主持拍嘅《香港秘密搜查官》，都見到佢哋演出非常落力。而早前ViuTV播出嘅《七救星》入面，佢哋唔單止獲七師傅「打救」，令更多觀眾認識，佢哋仲因為節目而結緣，七師傅組成OMG組合，結果獲網民紛紛支持。佢哋又一齊出歌《Oh My 7 God (feat. 七仙羽) – JNYBeatz Remix》，四人仲一齊共舞拍MV，突顯「師傅愛你」精神。
