十多年前已跑新聞、曾採訪馬尼拉人質事件嘅《東張西望》主持人、「一蚊Joe」aka「Master Joe」嘅游莨維，上周五（10日）採訪突爆seed鬧「港聞記者畢業未」後，引嚟唔少現職及前記者認為佢以年資撻人，雖然佢事後已del po兼出新po解釋，但仍有大批網民留言以表不滿。
【新聞有價 記者有格 立即訂閱：https://bit.ly/3wGQh7c】
到琴晚（13日）開始，有大量網民喺佢個po留相同留言：「支持Monster Joe不用理會別人 做一個良心好記者」，當中大部份疑為印度人，只有少部份疑為本地人名，所以被網民質疑買留言，話唔單止留同一句嘢，而且連master都串錯，「買LIKE買到被人發現真係好樣衰」，後來就有網民惡搞，留言話「我入嚟支持Cookie Monster的」、「支持master chef 」。
一蚊Joe上星期採訪完中環槍擊案嘅警方簡報會後，出po話「MJ我雖然唔係港聞記者，但係2010年我採訪馬尼拉人質事件嘅時候，你畢業未呀，港聞記者？」佢事後刪po，之後再po長文講返爆seed原因，話當時「被一位後生嘅『工作人員』不斷單打，話『東張西望都嚟採訪，阻住晒～』。」佢認為大家都係做嘢，又提到自己由2008年開始，已開始採訪生涯，「當中受過的冷眼和冷言冷語已經不計其數，結果今次谷住啖氣」。
#游莨維 #港聞記者 #東張西望 #馬尼拉人質事件 #一蚊Joe #MasterJoe #MosterJoe
