要幾大膽幾肯搏先會做呢個promotion？噚日（12號）HKTVmall宣佈增加竹篙灣呢個派送地點，為而家喺隔離營嘅香港人「營中送暖」！
小編喺Facebook話訂單買滿$100，並於結賬時入埋優惠碼「PBQCD100」，即有免運費派送。而由於需要依照申請手續，訂單會喺下星期一（17號）開始派送，而派送可能需時，就請大家耐心等下。貨品會經由送貨團隊派送至竹篙灣，之後交由隔離中心工作人員代為轉交畀營內嘅收件者。
而小編都有提提大家，香煙、雪茄、煙草、噴灑式飲品、賭博用具、容易腐爛物品及未經醫生處方之藥物係唔送得入去架。
有唔少網民都好關心「Team竹篙灣」嘅保護措施，小編都好有心機咁解釋返畀網民聽，就話「Team竹篙灣」會由專屬車隊運作及派送，而呢個團隊係唔會參與其他地區派送工作。另外，派送人員只會將訂單放到指定交付地點，由隔離中心工作人員轉交，係唔會直接接觸正在隔離嘅人。「Team竹篙灣」都會每星期進行兩次檢測同埋嚴守防疫指引，工作前後需要徹底消毒。
除咗防疫，網民都關心「Team竹篙灣」嘅待遇，話「公司應double pay 俾送貨員及司機」，同埋「希望可以加返啲津貼俾送去嗰到嘅前線員工啦，始終嗰到都比較大嘅風險」。原來HKTVmall都有額外津貼，「感謝他們為隔離人士送上所需」。
網民都大讚HKTVmall呢個做法，除咗「好窩心！充滿溫暖」之外，都有人講笑話「終於唔洗自帶微波爐啦」。
