有咩慘過撞車？就係撞上撞完之後，隊後再隊前！九龍城香港眼科醫院門外的士站就有俗稱「小露寶」嘅的士上演呢一幕。佢先撞到前車，又累前車撞到再前面的士，之後加速溜後隊埋尾車，最後再對隊多次前車。被撞嘅司機都即刻落車指罵「小露寶」司機，後車司機爆粗鬧「做乜L嘢」；途人見到都忍唔住話「發咩神經呀！」
網上流傳車Cam片段，見到噚日（16日）下午近4點，眼科醫院門外的士站原先有最少5架的士排隊等載客，當排最前嘅的士載客駛走後，後面的士逐一駛緩緩上前。但一架業內俗稱「小露寶」嘅大車箱的士慢慢駛前之際，唔知係咪踩錯油門，突然加速衝前撞向前車，更「隔山打牛」再波及頭位的士。
車Cam拍攝意外一刻嘅司機都即刻大聲「欸～！噢～！」但相信佢估唔到嘅係，涉事「小露寶」撞車後未有停低，反而加速溜後，即使佢係咁響安都阻止唔到意外發生，結果被撞到引擎蓋都變晒形。但仲未完，「小露寶」司機都仲未煞停架車，最後再隊多次前車車尾，重演多次「隔山打牛」，先終於停定架車。車Cam司機忍唔住鬧「嗰架小露寶唔知做乜L嘢，撞L到前面再撞到後面，成個車頭冚起晒！3架！」
意外後司機們都先後落車檢查損毀情況，而身穿藍衫嘅肇事司機落車後，不時摸摸後尾枕；醫院保安之後都嚟影低情況。
有網民留言話，「小露寶」XR牌新車未必夠一個月；亦有人話現場就係眼科醫院，肇事司機應「驗眼」，又質疑佢「香港腳發作」。有網民就講笑話「揸開碰碰車，一時唔記得今日的士替更」、「呢架係蠱惑的車，會向前向後再向前，梅花間竹咁。」
