今日網傳幾段影片，疑似醉娃大戰的士司機！
事源有位的士大佬喺灣仔接載一名女乘客，過海後駛到旺角目的地時，女乘客先發現自己上錯車，更拒絕畀錢就落車，司機追足幾條街！
司機喺片中透露，女乘客喺灣仔係主動載的士，但到旺角先話原來佢係call Uber，話Uber系統收咗佢錢，拒絕畀錢司機。司機就解釋自己唔係做Uber，亦唔係揸白牌車，係女乘客自己搞錯上錯車，要求佢按錶畀錢同畀$20隧道費。女乘客不斷講粗口話唔關自己事，揚言要報警，更一度落車離開，司機立即追住，期間女乘客曾疑似用Chanel袋攻擊的士司機。
女乘客返到的士附近嘅馬路，見到警察即要求佢哋喺的士搵100蚊紙，以證明自己有畀錢，警員拒絕並要求女乘客上返行人路，話要按程序先了解事件，但女乘客發爛渣聲稱要投訴警員。
最後，警員畀女乘客上的士搵佢聲稱「揼咗畀司機」嘅100蚊紙，其實從影片所見，女乘客的確曾經取出$100，但不知道掉到哪裡，而直至影片完結都搵唔到。
