好多人都有夢想，但追夢真係坐言起行～ 黎明嘅唱片公司AMusic今日介紹兩組新人，包括女子組合Lab及男新人YUTA，其中Lab成員Apple年僅16歲，上年喺學校歌唱比賽演唱《記憶綿》，比賽片段被放上YouTube後，觀看次數至今已錄得逾45萬次。
AMusic喺簡介都提到，Apple參加學校歌唱比賽，亦得到唔錯成績，但因為學業為重，只能用課餘時間去投入自己興趣，亦唔可以付出額外時間去參加電視台比賽，所以自動投稿畀AMusic，睇下有無機會實現夢想，結果Apple就贏到同AMusic合作嘅機會。
另一成員iK都熱愛唱歌，但因為過兩個月就要去日本做交換生繼續學業，所以AMusic都 寫咗首合唱歌畀佢哋兩人，達成佢哋嘅音樂夢。佢哋首隻新歌《你是我的病》已經上載喺YouTube，MV入面雖然只見兩人背影，但聲線甜美清新，又好夾，值得大家花幾分鐘去聽聽畀支持。
至於20歲嘅YUTA熱愛音樂，所以將自己唱嘅Demo寄去AMusic，同時係一位電競選手，目標有日可以代表香港參加電競比賽。佢嘅新歌《推理的愛》都可以去YouTube聽聽，一樣高質，仲係林夕填詞添！
而黎明今朝都喺社交平台出po介紹佢哋新人嘅時候，繼續發表金句：「作為一位音樂從業員，要早起身，如果可以就早瞓早起，如果唔可以就只能夜瞓，但都要早起，始終一日之計在於晨，音樂作品完成終於亦都意味住音樂從業員可以早瞓…但呢個係唔會發生，由於時代太繁華所以本職亦要負責推廣音樂，總之大家共勉之啦！」
