黃智雯（Mandy）早前到尼泊爾做探訪，當地「童婚」令她最印象深刻。她與一個6歲的女孩交談期間，女孩分享自己的夢想Mandy好感動，決定助養她。
【新聞有價 記者有格 立即訂閱：https://bit.ly/3wGQh7c】
Mandy去年宣佈離開效力16年的無綫，並與戀愛11年的圈外男友結婚。她接受HOYTV主播俞詠文（Angela）訪問。講到去年離巢結婚同年發生，Mandy表示純粹巧合：「我個人好隨緣，一條時間線到咗呢個歲數階段，需要發生嘅咪發生，好似好戲劇化咁，所有人生中嘅大事都係同一年發生！」因為回復自由身，Mandy可以安排自己做想做的東西：「因為我個人好怕悶，多咗時間，而自己嘅主導性又強咗好多所以可以揀一啲我好想做嘅嘢去做。」
她透露早前跟培幼會去到尼泊爾做探訪幾個家庭：「其中最令我印象深刻嘅就係『童婚』，佢哋好多15，16歲就結婚，對象都係一啲地位比較高嘅社會階層，而當地嘅貧富懸殊都好嚴重，所以佢哋遭受父母嘅反對，跟住畀屋企趕走！過啲好貧窮嘅生活，咁細個冇接受個應有嘅教育，又已經生咗小朋友，咁成個人生同埋生命似乎就係咁樣！我哋有問過佢，如果可以再揀嘅話，會唔會咁早結婚？當時佢冇回答，但係從佢嘅眼神，就見到佢嘅無奈，所以我哋身處香港都好幸福，可以有選擇，有自己嘅主導性，但係佢哋唔係！」
雖然身處貧窮的國家，但係黃智雯好欣賞他們的知足：「當地嘅女仔好鍾意跳舞，一着上一啲好靚嘅跳舞服裝，佢哋就會好投入，雖然佢哋物質上唔會好富裕，但係從佢哋嘅笑容，同埋跳舞時候嘅滿足感，原來我都可以為佢哋帶嚟開心，同埋佢哋係好積極面對，佢哋嘅困難同艱苦。」
另外，今個探訪之旅，Mandy更加助養了一個6歲的女孩子：「同佢傾偈期間，佢同我分享佢自己有一個夢想，令我好感動嘅係，佢唔會諗自己冇啲乜嘢，反而係有自己嘅一個目標，同埋都有探訪過佢屋企知道佢屋企好貧苦，小朋友唔能夠得到均衡嘅飲食，雖然係咁樣，但係佢媽咪仍然希望可以負擔到囡囡讀書嘅學費，所以我決定助養呢個小朋友！」
談到未來的工作，黃智雯表示很想嘗試一些新事物：「希望可以嘗試一啲新嘅角色，同唔同嘅團隊合作，當然好希望同新公司嘅兄弟姊妹合作啦！其實我同朱茵蔡少芬都冇合作過！又或者可以同阿Paul黃貫中做下音樂上嘅交流都好唔錯呀！」
