黃子華聯同鄧麗欣（Stephy）、王菀之、張繼聰、林明禎及陳湛文主演的電影《飯戲攻心》，由9月上映至今票房已破7200萬，成績亮麗。之前Stephy已為達 6000萬票房找數，大派福利騷泳照後，今次論到大佬子華為達7000萬票房找數，昨晚子華在Facebook上載自拍短片，彈結他唱《毒藥之歌》，分享多年來被封票房毒藥的感受。
【新聞有價 記者有格 立即訂閱：https://bit.ly/3wGQh7c】
《飯戲攻心》超過7000萬票房，子華在片中說：「上咗7000萬票房，承認大家要分享下，都少有呀，十幾廿年嘅票房毒藥，都係一個記錄。」不過，子華笑說現要說感受都很尷尬，似自戀又自憐，所以他選擇用另一個方式去表達，跟着子華就拿出一塊結他Pick，再拎起幾年沒有彈過的封塵結他，為今次找數唱歌仔。
子華邊彈邊唱出《毒藥之歌》：「從前有個藝人，佢好紅，係票房鶴頂紅，佢用一隻《一蚊一隻雞》，自斷米路好架勢。佢朋友冇普通人，唔係影帝，就係電影嘅神，成日吹水拍戲，拍戲有幾激氣，我惟有收聲為佢哋暗暗打氣。翻身無望，保證冇票房，不麻煩人哋，自己會收起，我要紋身，紋晒整個人，咪叫我再拍戲，我主動唔玩拜拜你條尾。」
子華說那時候很絕望，但如詩人所說，絕望和希望一樣都是虛望，都已接受了命運，但為何又忽然間會：「7000萬…7000萬…7000萬…噢 ，7000萬 …7000萬….7000萬…..不過，你放心我唔敢囂，點解呀？因為剎那光輝唔係永恆，呢套7千下套要留神呀，一朝得志冇好意思，打回原形話咁易。」子華不忘為下套新片唱好：「所以今日最希望，其實要大家，記住以下呢四隻字，好緊要呀…《毒舌大狀》…《毒舌大狀》…重要嘅嘢講多次，《毒舌大狀》…《毒舌大狀》…希望出年順順利利，大家會入場睇呢齣戲！」
最後子華再搞笑說：「找完數，你搞清楚，我唔係王菀之、張繼聰，啱啱搞呢段嘢係難過除褲好多呀，唔好再叫我除褲...…除非......當然啦，下次《毒舌大狀》又有好好嘅成績，不過，《毒舌大狀》係出年嘅事，呢年仲差好幾個月何以解憂，惟有《飯戲攻心》，希望大家繼續支持，多謝多謝。」
