TVB劇集《金宵大廈2》中，演員黃婉華塗黑面飾演菲傭一角引起風波，TVB指無意圖不尊重或歧視任何國籍，向受影響人士致歉及將相關集數下架。港姐冠軍麥明詩日前就話︰「香港如果能夠畀多啲機會少數族裔演出，Represent（代表）番自己種族，而唔係由另一個種族去Represent，唔係更好咩？」而有網民就話麥明詩言論「左膠」。
昨晚麥明詩就喺Facebook反擊，直接認自己偏左，又話事情觸動到佢嘅原因，係因為英國讀書時受過歧視，「我價值觀係偏左，即係有啲人口中嘅『左膠』，其實每人都可以選擇自己嘅立場同價值觀，我對件事有感覺係因為我嘅個人經歷，如喺英國讀書時係有受過microaggression（微歧視），如白人同學模仿accent（口音）嘅嘲笑，當眾除褲問你見過咁大未（當然大部分同學超好超nice），明白係人性並接受但係覺得如果冇就更好囉，所以喺香港變番做『大多數』嘅時候，會對其他地方黎嘅人都比較sensitive（敏感），係，係寧願矯枉過正，呢個係我立場，不喜可以繼續插。而且唔同人有唔同經歷因此有唔同嘅睇法，也是非常理解的，有啲人超有自信覺得被人串被人笑佢都好喜歡咁都唔出奇。」
麥明詩又舉例有白人將皮膚塗黃扮華人，又講帶有華人口音的英文，華人同樣未必欣賞。麥明詩最後都話今次不是首次公開偏左言論，亦預料後果。
「順帶一提，我都唔係第一次講偏左嘅觀點，每次都俾人問候㗎啦，難道我唔知有唔少人憎『左膠』勝於一切。但係我發覺如果我淨係喺幕前嘅話（單一收入源），我會唔敢講我想講嘅嘢，冇必要無啦啦乞人憎。講真，如果一個人講嘅嘢個個都同意，就冇必要講啦。」選擇矯枉過正的麥明詩，當然繼續「惹火」。有網民認為︰「唔通演員演肥仔肥妹角色去增磅，又叫歧視咩？」
圖片來源：麥明詩Facebook
