YouTuber雪姨出名有錢兼識投資同做生意，但遇上Chanel，就連雪姨都有「墮馬」嘅一刻。早兩日雪姨喺IG開Live，同觀眾一齊開箱Chanel嘅聖誕倒數月曆，仲諗住搞Giveaway，點知「唔開由至可，一開把幾火」，由一開始嘅水晶球吊飾，到後尾開嚟開去都係貼紙、書籤、磁石，除咗令雪姨懷疑自己買咗文具套裝，仲令佢不停「陶大宇上身」掩面大叫「WTF」。雪姨嘅激動反應仲令好多人忍唔住爆笑，就連Frankie@MIRROR、保錡@ERROR都忍唔住留言。
雪姨開頭都好有耐心好平和咁介紹，直到佢由開到塊「Chanel鏡」開始，雪姨嘅連環不幸事件就開始了，「喂喂喂，大佬，輕飄飄嘅喂？！Chanel No.5布袋？」、「26號Boxing Day你拆塊鐵片俾我？」、「書籤？！我想問香港人有無咁鍾意睇書先？！我係咪librarian呀大佬？」、「Fuck！我六千幾蚊買咗堆磁石！！」、「擴香石？唔香㗎喎？！」⋯⋯文具套裝令有錢如雪姨都肉赤，「不如大家唔好要，成八千幾蚊，不如拎上Carousell賣，分Q咗佢啦喂！」
但睇嚟最激心嘅都係一條「5號手繩」，「有咩人會戴個5號出街呀？」，火上心頭嘅雪姨忍唔住自嘲，「我係馬咩？我個樣似曬駱駝啫，但唔等如我要戴5號㗎嘛，5號代表我人生咩？」，「平時啲人話我點樣嘥錢，我都唔覺得嘥錢，因為我自己鍾意呀嘛！Chanel我唔係唔幫你呀，我點幫啫！！」然後開到懷疑人生嘅雪姨，最尾終於開到枝唇膏⋯⋯不過雪姨扭開佢就知係Mini Size，嬲到手震跌埋落地下，「我畀六千幾蚊，你畀枝貨Size我都唔得，係要迷你嘅？！？！」。雪姨係Live尾忍唔住再大爆發，「我俾人呃到透呀！」，仲話明白點解啲人最鍾意個大盒，而唔係鍾意入面啲嘢。
其實名牌呢啲嘢，不嬲都係你覺得值就值，雖然6000幾蚊買個文具套裝係貴，但Channel絲學斷蟹話齋，買個盒送化妝品，又送書籤，又送Chanel No5手繩，仲有嚿擴香石添，一個文具套裝咁細，搞到成個降落傘咁大個，都只係賣六千幾蚊，今次真係我問你死未～
