陳穎欣（Yanny）將於蛇年跟拍拖近8年的音樂人男友陳考威拉埋天窗，她出席經理人公司新春團拜時，坦言男友在頒獎禮台上宣佈婚訊感到很大壓力，又希望可以到海外舉行婚禮。
陳考威於月初《叱咤樂壇流行榜頒獎典禮》上勇奪「叱咤樂壇監製大獎」，在台上宣布年內與女友Yanny拉埋天窗。榮升做準人妻的Yanny約將最後一次以「女朋友」身份過新春，她笑言：「雖然最後一年𢭃利是，但都唔會好搏命𢭃，因為我派一定比𢭃到嘅多，新年我會出發到北海道旅行。」問到婚禮籌備進展？Yanny指希望在2026年初舉行，但暫時仍有工作在身，她表示希望盡量得閒些才搞婚禮，亦不想在好熱同雨季時搞。Yanny稱原本想去日本舉行婚禮，但傳聞有天災，不想到時賓客同自己會擔心，所以可能會轉地方，現時亦物色那裏有舒服、安全又有些好回憶的地方。
至於可有為成為人妻而做準備？Yanny笑指不需要：「其實婚後生活冇乜分別，不嬲都一齊住，我只係多咗個稱呼，但我自己聽到家姐叫姐夫做老公，或姐夫叫家姐做老婆，感覺好奇怪，因為太親暱，我諗我同佢要一段時間先消化呢個稱號。」至於婚後，Yanny表示會繼續幕前工作，暫時沒有生B計劃。
對於男友在叱咤頒獎禮上無預警宣佈婚訊，Yanny表示：「佢唔係一個甜蜜嘅人，佢好木訥，我知佢如果得獎，佢話會多謝我，我仲諗佢唔會講呢樣嘢（指結婚），佢幾怕醜。叱咤真係好多人睇，嗰晚好多人Message同打電話畀我，但我係一個比較低調嘅人，嗰刻好大壓力，第二日收拾心情先再覆。」
場地提供：九龍香格里拉（香宮）
