陳卓賢（Ian）推出今年最後一首以故事串連的單曲《玩偶奇遇記》，終揭曉他在故事中所飾演的主角，原來是一隻玩偶熊仔，他更將自己不太會表達自己的個性投射到玩偶熊身上，亦希望透過歌曲提醒大家生活上所有事得來不易，要多些在不同角度思考。
MIRROR成員陳卓賢表示自去年年尾開始，Ian便開始構思創作一個故事，並透過歌曲及MV呈現出來，今年的5首歌每個章節都有熊仔出現。玩偶熊仔見證着一段愛情的開始、發展到終結，隨後亦有他自身的經歷，不過熊仔既無話語權，亦未能表達自己的意願。
至於為何會揀選玩偶熊仔做故事主角，Ian解釋：「因為人畜無害，同埋好似好多公仔都係熊仔，大家可能好多時會忽略咗佢，覺得佢嘅存在係理所當然。睇呢個故事嘅時候，亦唔覺得隻熊仔係關事，純粹係好表面覺得熊仔係定情信物，見到熊仔就好似見到你嘅另一半，但慢慢就帶出比較深層嘅意思，緊扣返主題：其實熊仔喺MV裏面有唔同形態出現，亦都係代表每一種心情，不過熊仔有很多無能為力嘅事，譬如佢都好鍾意主人，但言語上、肢體上都表達唔到自己。」
Ian透過歌曲故事，最希望能透過這個故事給大家一點提醒：「其實生活上唔係所有嘢都理所當然，可能有時要諗闊少少諗遠少少，所有嘢得來不易，要多啲喺唔同角度去諗。」他又透露玩偶熊仔亦是他個人的個性投射：「我都係一個唔太會表達自己嘅人，所以出一個咁嘅故事，睇下會唔會都有啲有共鳴嘅朋友。」
此外，Ian在新片《久別重逢》飾演鄭伊健的少年版，在音樂琴鍵上樂而忘返，對未來充滿瞳憬。但現實生活中的Ian卻以另一個角度聚焦角色成長，透露未知亦有其可貴之處：「人生有趣嘅其中一個地方，永遠唔會知道將來嘅自己係點。即使我睇到另一個階段嘅自己喺電影入面出現嘅時候，現實生活中我都冇去諗將來嘅我會係點，反而係想專注喺目前嘅嘢。」
