闊別紅館五年，梁詠琪（Gigi）決定明年2月17、18日，再次踏上紅館舞台，舉行一連兩場《梁詠琪 時間遇上我們》演唱會。日前Gigi為個唱拍攝海報，穿上LadyGaga、Jennie@BLACKPINK同樣鍾情的設計師Simone Rocha；設計的鮮紅色漆皮外套，令平日外表柔弱的Gigi，變得霸氣十足。
【新聞有價 記者有格 立即訂閱：https://bit.ly/3wGQh7c】
Gigi謂：「以前演唱會，總會着公主裙，哈哈，但今次嘅造型好唔同，好似着住盔甲、武士道服裝，件褸好重，但影出嚟好靚、好powerful、好sharp，但亦都夾雜咗好浪漫嘅lace，好符合我今次想表達嘅主題。」
今次Gigi的個唱，以「時間」作為主軸，劃分「昨天」、「今天」、「明天」三個部份，用歌聲與樂迷分享這幾年間的成長和體會，因此演唱會取名為「時間遇上我們」。Gigi解釋：「以往會用一種慶祝方式去打開一個演唱會，但呢幾年好多事情發生，我哋嘅舒適圈消失咗，你冇辦法改變佢，但我哋可以用呢段時間，去做一啲我哋未做過嘅事，令時間與我們重新接軌。我希望用一種比較接近劇場表演嘅方式，配合舞台、畫面嘅設計，帶大家一齊打開一個時間錦囊，去重溫我多年嘅歌。」
Gigi的囡囡Sofia也熱愛唱歌、跳舞，演唱會會否母女檔上場？Gigi忍不住大笑：「佢好搞笑，當佢知道我開演唱會，佢問：『咁我呢？』嚇死我，以為佢想上台，原來佢擔心要返學無得去睇，其實囡囡唔會上台啦，佢喺台下搖吓熒光棒，已經好開心。」
