鍾嘉欣（Linda）一連三場佛山站個唱昨晚（1 日）假嶺南明珠體育館圓滿落幕，嘉欣的父母及孻女Anika現身撐場，獻唱《做你的晨曦》時更被歌詞感動到喊。她又透露Anika一聽到音樂便好有節拍感，聲音又清脆，最有機會繼承她的「衣砵」。
【新聞有價 記者有格 立即訂閱：http://bit.ly/3wGQh7c】
鍾嘉欣《Remember記得‧鍾嘉欣演唱會曲》繼早前在廣州開騷後，相隔3個月再於佛山舉行個唱，依然熱爆，三場均座無虛席，Linda更罕有獲父母及孺囡Anika由溫哥華到佛山捧場，難怪Linda指佛山站演唱會，對她來說別具意義。
雖然跟之前廣州站一樣，Linda以經典金曲《一顆不變的心》為演唱會揭開序幕，不過個唱流程、舞台設計、服裝及燈光效果卻截然不同。她指有了上次經驗，今次心態有些不同，亦都變得輕鬆：「今次重點反而係點樣令個演唱會進步，睇番之前嘅片段、觀眾嘅反應，從而去調節，希望每場演出都畀到觀眾新鮮感，令觀眾覺得值得嚟睇，亦因為每場嘅變化，令自己有一份刺激感。」今次佛山站演出除保留「扔花球」外，還加插「民選」歌曲環節，她指與觀眾一齊唱《月亮代表我的心》好感動，這歌曲亦是劇集《護花危情》一首好重要的歌，好代表到她的愛。
Linda的父母今次亦有現身撐場，她說：「其實我入行咁耐，阿爸阿媽好少機會睇我演出，阿爸直頭係未睇過，好開心佢哋終於可以睇到，親身見證佢哋個女努力嘅表現。因為我大囡同個仔都要返學，所以淨係細囡嚟，佢都係第一次睇我演出，佢嘅反應好興奮，雖然佢戴住耳塞，但都睇到又跳又唱。」她續指獻唱《做你的晨曦》時，被觀眾席上的媽媽感動到喊：「呢首歌係講我對女兒嘅愛，因為今次媽媽在場，唱呢首歌時會憶起好多媽媽湊我嘅回憶，令我忍唔住喊，冇諗過自己會喊，好感動，所以每次望到觀眾席上嘅爸爸媽媽同個囡，我都要避開視線。」
Linda表示三名子女當中，她覺得孻女Anika最有機會繼承其表演的「衣砵」：「佢雖然最細個只有兩歲，但性格比較外向，把聲好大聲又清脆，唱歌應該會幾好聽，而且佢一聽到音樂及拍子聲就會跳舞，好有節拍感。」
