香港巨星張國榮今年離世20周年，環球唱片將推出《REMEMBERING Leslie》向哥哥致敬，並由多位樂壇新一代演繹張國榮名曲。繼早前盧瀚霆翻唱《偷情》，近日亦推出由MIRROR另一成員姜濤重新演繹的《追》。歌曲MV上架後惹來樂迷討論，如跟MIRROR首支英文歌MV同日發佈，又把姜濤早前在台上演唱《追》時的水準再討論，更惹來姜濤親自回應網民，盼大家專注在音樂上。今日（20日）官方再發布《追》的消息，並由姜濤親自講述對張國榮的感受。
【新聞有價 記者有格 立即訂閱：https://bit.ly/3wGQh7c】
由徐浩擔任監製，並與黃兆銘共同編曲的《追》，是經典電影《金枝玉葉》的主題曲。談到今次重新演繹《追》，姜濤直言唱得很舒服：「以前在演唱會都唱過，知道自己屬於中音的range（音域），而這隻歌都係中音區，故令我唱得好舒服。當然要聽回哥哥原版演繹，至自己重新去唱、並重新編排時候，一定要有自己風格、唱法，太依賴會予人覺得太模仿，不想給人覺得是模仿，因為哥哥是模仿唔到。」
《追》的監製是與姜濤合作無間的徐浩，姜濤直言對方非常了解自己的風格和聲線，錄音過程亦相當順利：「雖然之前演繹過這隻歌一次，但用新編曲完整地演繹，需要一邊唱一邊搵感覺，幸而比想像中順利。首先首歌嘅range比較啱我，加上同監製好熟，沒太多阻滯。本身預兩日錄，變咗一日就搞掂。」
至於對哥哥的印象，姜濤表示從小已經由媽媽和親戚口中聽到他的名字：「8、90年代嗰一輩親戚都好鍾意哥哥，由細到大都有聽他們播《追》。我有睇哥哥以前一些訪問，感覺到他好放鬆，是好自信的一個人。」
電影《家有囍事》亦令姜濤留下深刻印象：「對小朋友嚟講好鍾意睇，會覺得『點解佢可以將個角色做得咁傳神』，《胭脂扣》都係我有去了解的作品，因為我都睇過梅姐（梅艷芳），入面的橋段我很好奇，搵返套戲嚟睇，覺得他兩個真的做得好好，因為好少藝人可以將唱歌同演戲都做得好好。」
除了唱功和演技外，姜濤亦非常欣賞哥哥風趣幽默的性格：「我們現在做訪問多少都會有點拘謹，可能人生閱歷未夠，好多人都有睇過哥哥《今夜不設防》訪問,他重新定義甚麼係Charm，不會淨只在鏡頭前一張相，更有其個人談吐、氣質。現在節目不會俾你食住煙去傾偈，但他可以好Chill，那年代的Artist人格魅力係更加突出，哥哥也是最突出的一位。」
