鄧小巧本周末舉行兩場音樂會，她透露跟健身教練的老公做帶氧運動及平板支撐（plank）等體能運動，更預告會在騷上表演側手翻。
鄧小巧將於本周六及周日（5及6日）假旺角麥花臣場館舉行兩場個人專場音樂會 《I'm here Live 2025》。繼《神愛世人》後，日前推出又一治癒作品《其實痛是你的想像》。
新歌歌詞一如以往由小巧親自主理，以「人」的角度詮釋「痛」，以旋律安撫受傷的靈魂。她解釋：「我碌IG嘅時候，見到一個心靈post，話人生入面其實百份之九十九嘅痛都係來自你嘅價值觀，然後你身體嘅痛先至係真正無可避免嘅痛。我個verse嘅來源就係南宋一個僧人慧開禪師，佢寫嘅一首『春有百花秋有月，夏有涼風冬有雪，若無閒事掛心頭，便是人間好時節』嘅詩，我覺得人活得越耐，越過得平平安安、冇咩特別嘢發生、人生冇乜起伏，就係一個好值得感恩嘅事情。」
提到開騷在即，小巧表示已密鑼緊鼓籌備，但心情平靜：「而家應該係去到on show嗰刻先識得緊張，努力準備中。」她又笑言：「努力打關斗，努力瞓覺，努力去令自己嘅狀態最好。」至於體能，小巧指未有跟身為健身教練的老公白先生做gym：「但係我就成日同白先生去行山，做啲Cardio（帶氧運動）。有時佢喺屋企會train我，同埋督促我每日做10分鐘嘅plank（平板支撐）。」6年冇開騷，問到小巧有否預備驚喜給歌迷，她立即「自爆」說：「我都唔知大家覺得嘅驚喜係乜嘢，側手翻？講咗仲算唔算係驚喜？哈哈。」
