謝霆鋒早前宣佈今年4月於啟德主場館舉行兩場個唱，優先訂購門票隨即被秒殺。近日更有網上「黃牛」飛，被炒至17萬多一張。霍汶希（Mani）呼籲歌迷「理性啲」，勿幫襯黃牛。
謝霆鋒相隔25年，今年4月25及26日假啟德主場館舉行《EvolutionNic Live謝霆鋒進化演唱會》，更是亞洲首位登上場館開騷的歌手。消息一出全城即現撲飛熱，上月的信用卡優先訂購，門票隨即被秒殺，一票難求。
由於全城瘋搶，近日疑似「黃牛」於網上放飛，門票被炒至17萬多一張，認真誇張！雖然霆鋒開騷，但就連母親狄波拉都大呻冇飛，英皇集團主席楊受成透露：「阿拉姑都嗌晒救命呀！」問到現在是否不夠膽聽電話，驚人打去求飛，楊生直言：「聽！點會唔聽！我話你哋登記先，到時如果有我就俾你。」再問會否加場？楊生發揮幽默本色：「你知佢好有性格㗎！冇人可以叫到佢㗎，佢而家諗緊。」
對門票被炒高至6位數字，英皇娛樂集團營運總裁霍汶希（Mani）日前跟楊生、久未露面的四哥謝賢、霆鋒及拉姑團拜，Mani勸大家要理性購票：「大家咁支持霆鋒當然開心，但希望大家理性啲，唔好咁炒貴啲飛，同埋唔好幫襯黃牛。」
