裕美接受電台訪問時，自爆教好友「五索」鍾睿心說話要夠爆，才能令人留下深刻印象，更直言：「正正經經講嘢邊會有人聽！」
裕美到新城廣播接受羅沛琪、施匡翹及華浩然主持的《寵愛您》節目訪問，與男友林作飼養了兩隻貴婦及兩隻唐狗的裕美，從小到大都在狗狗陪伴下長大，而她喜歡毛孩多過人類，裕美解釋：「我隻貴婦好奸，每日咬爛我一條底褲，又或者喺我床上屙尿，但佢最多都係百厭，佢唔似啲奸詐人類，人好複雜，所以我鍾意狗多過人。（咁你愛狗定身邊嗰個多啲呢？）梗係狗啦！」
裕美形容林作平時口沒遮攔，卻名副其實是愛狗之人：「我哋唔會為狗狗吵架，林作得意在隻狗幾百厭都好，佢唔打唔鬧，如果隻狗喺床上屙尿，我嬲到想打佢籮柚，但林作會即刻抱走隻狗，然後就會話『佢唔識㗎嘛』！」
裕美經常跟愛犬傾訴心事，她憶述早年患有嚴重抑鬱症時，就是靠愛犬獲得溫暖 ：「當時唔想出去見人，匿埋喺屋企又成日失控落淚，好似跌咗落地獄，但我隻狗會主動走嚟我身邊坐定定，見我流淚，佢又會舐我臉上嘅眼淚，知我唔開心，佢會盡所能安慰你，呢份溫暖好難得。」裕美又指狗狗的世界只有她，她寧願愛狗也不愛人：「人一變你係唔知佢會有幾恐怖，狗最多係百厭，所以有咩事我都會攞條命保護啲狗。」
裕美與好友「五索」鍾睿心不時在社交平台上載影片及大談兩性關係，她透露五索想拍，所以用自己經驗教她如何令人留下深刻印象。羅沛琪形容五索帶給觀眾很多話題及負評，問裕美是否超出她想像？裕美表示絕對是她想像的：「我就係要咁，老實講，你正正經經講嘢邊會有人聽，一定要爆。（佢甩頭髮？）係佢自己問題，我諗佢壓力好大，未必關外間事，佢私下可能有好多問題要解決。」
