將於周日（16日）出嫁的衛詩雅（Michelle）早前到柬埔寨探訪一星期，感受甚深。她獲一名得到支援有機會學化妝，及後成為當地人氣化妝師為化新娘妝，Michelle坦言：「好有意義嘅新娘妝。」而她探訪助養的「女兒」Chankoa時，更忍不住眼濕濕。
準人妻衛詩雅（Michelle）與導演劉偉恒（Benny）、太太及兩個女兒，早前跟宣明會到柬埔寨兩個社區進行探訪，體驗當地居民及孩童生活。
Michelle自言自己性格很感性，公司同事都提點她控制淚腺，唯去到當地探訪仍忍不住被觸動落淚，她表示：「去探訪知道會有感受，但係冇諗過咁多感受。好似佢哋同我化新娘妝咁，嗰個年青人得到支援有機會去學化妝，而家仲係當地嘅人氣化妝師，真係好感動，呢個係好有意義嘅新娘妝。」
而Michelle最快樂的行程，就是到即將完成發展目標的Baribour社區，與助養了6年的助養女兒Chankoa見面，她又與「女兒」溫馨做手工：「見到佢已經眼濕濕，但係又唔想嚇親佢，所以要忍住啲眼淚。我仲扮晒阿媽咁，叫佢拎啲功課出嚟睇吓，我即刻有啲唔好意思，因為我用當地嘅高棉語寫咗張卡畀佢，但係佢啲字靚過我好多。」Michelle表示手寫高棉語，是未婚夫的意思：「佢叫我唔好寫英文，用返當地語言容易啲溝通，我即刻開電話睇住個翻譯嚟抄。」她希望將來能帶同未婚夫再度探訪：「希望15年後，我再返嚟探佢哋，見證佢哋嘅改變。如果將來有小朋友，我都好希望佢哋可以睇到呢啲片段，甚至有機會嚟經歷吓。」
Michelle直言相信上天給予她這次探訪的機會，必定有意義：「我真係好感謝可以嚟到呢度，我睇到佢哋好勤力，只係佢哋冇資源同方法。我哋身邊有啲人，畀咗方法佢哋、教佢哋點做，但係佢哋就係唔做，但係呢度嘅人好努力。可能只係畀一隻雞佢哋，話畀佢哋聽可以點，佢哋就可以變到依家咁。所以我覺得真係要珍惜，珍惜你哋擁有嘅一切。我唔係話一定要大家捐錢，但係至少遇到困難，唔好話『我好慘』、『我冇辦法』，辦法一定有㗎！」Michelle表示經過這次的體驗，回港後即時再多助養兩名兒童，連同已經助養的三名兒童，準備榮升「五孩之母」！
