邊個話追星一定要追唱歌跳舞嗰班？近排香港真真正正整咗個「全民造星」出嚟，「豬肉檔阿威」呢個名首先響遍師奶界，被稱為「荃灣街市AK」嘅佢就食住個勢，開埋YouTube Channel，FB，IG，仲接埋第一個廣告。香港地呢個地方真係咩都有可能…
噚晚（5月19日），阿威嘅官方Facebook、IG、YouTube Channel正式出街，而他各個平台在半日間已分別吸引數千粉絲，第一條片就同大家打個招呼，「大家好，我係阿威，劉宋威！呢度係我分享煮食心得同日常生活，多謝大家一直支持我，多啲留意我嘅IG、Facebook同YouTube，我哋下次再見，bye bye。」有人留言就話阿威讀「YouTube」呢個字讀得好得意，有人就話「你帶乜嘢貨我都會跟着你買㗎」。
個個走去文青Cafe打卡嘅同時，有一班不分年齡性別嘅「威威豬」不惜由港島過去荃灣等足一日，就係為咗見威威一面。Facebook群組「荃灣鮮肉威威應援團」仲突破1.5萬成員。撞正今日520，有人仲買咗幾條豬肉，砌返個520送畀阿威，Channel絲都不禁講返句，「真係好L癲」。
阿威仲接埋廣告sell鞋，「體驗咗一段時間，雙腳真係無咁攰，同埋每一步好似踩喺枕頭咁，好得意。前排有粉絲擔心我企得攰送咗啲足貼俾我，而家有咗SKECHERS工作鞋，佢地可以放心喇」咁話喎。
一向「跟得好貼」嘅德國駐香港總領事館都拎阿威嚟出post，教大家點樣用德文講「肉類切割技術員」，網民就留言話「跟市好貼！請問攬枕德文點寫？」，又話插圖「呢個唔似AK似Lokman」。
有人實會話「切豬肉都捧？」類似嘅說話，但係Channel絲就覺得喺呢段艱難嘅時候，有開心事搞笑事畀大家笑下、放鬆下都何嘗唔係一件好事～
