成日話，每晚睇完電視上面嘅激烈對決，就可以轉場去睇另一場戰事 － 討論區同埋咁多位導師評判嘅IG。
噚晚第三回合結束，foul多咗B組5位參賽者之後，網民一如既往都喺討論區大罵B組導師梁祖堯，話佢過咗咁多個回合都仲力保方方，反而放一啲好有觀眾緣，同埋有實力嘅參賽者入死亡名單。
面對咁多批評，花姐唔單止喺節目力撐梁祖堯決定，事後仲要喺IG限時動態話：「因為咩事要攻擊佢哋？勇敢為自己夢想努力嘅年青人，全力栽培年青人嘅導師，呢個世界本來充滿正能量，會越嚟越好，點解你哋唔慶幸世界仲有佢哋嘅存在，反而要踐踏佢哋嘅努力。」
咁啱第三回合評判之一嘅著名電影編劇及導演陳詠燊喺facebook開po大談「努力」。佢就話「對一個表演者來說，努力是基本的事情」，而唔係一個值得評判加分或者降低要求嘅理由。
喺娛樂圈打滾咗咁多年嘅Sunny直認「娛樂圈就是殘忍」，不過佢話「如果『努力而表現不理想』的人，所得到的與『努力而表現出色』的人一樣多的話，才是對後者的殘忍」，陳詠燊咁樣講一講，令人不禁懷疑佢係咪隔空回應緊花姐。
