上月張敬軒於香港完成一連11場《Revisit張敬軒演唱會》後，一個星期後便馬不停蹄展開巡迴演唱會，今次美國巡迴演唱會軒仔及團隊被安排乘坐私人飛機前往拉斯維加斯，務求以最佳狀態演出。
【新聞有價 記者有格 立即訂閱：https://bit.ly/3wGQh7c】
首站的美國賭城拉斯維加斯及Reno已順利完成。拉斯維加斯站是2年半內軒仔演唱會的第55場，Reno站則是第56場；拉斯維加斯的MGM入座達8千人，而Reno則有7千人，入場人次超過1萬5千人。
到埗後賭城氣溫高達40度，為了炎熱的天氣，軒仔特別訂造新歌衫，如opening的一套黑色馬甲deep v開到落肚臍；另一套黑色西裝戰衣，軒仔更真空上陣兼露腰，酷熱天氣下實行來一個大解放。軒仔指着自己身上的歌衫是特別為拉斯維加斯而訂製，「因為真係好熱呀！」台下歌迷立即大叫「除衫」，軒仔從容化解，「吓？除衫？咩除衫呀？數學嗰啲『除三』呀？九除三等如三。唔緊要啦，除晒就唔好睇㗎啦。你返到屋企除咗咪同我一樣。」他又調侃台下女歌迷，「而家年代真係唔同，而家啲女仔點解會咁大聲叫人除衫？我想問你哋對住你哋嘅男朋友係咪都係咁？睇吓你哋身邊嘅男士冇反應，你哋可以當住佢面叫第二啲男人除衫。」話口未完，便有男歌迷大叫「除褲」，全場立即歡呼，軒仔即奸笑道：「等我操吓先啦，我真係唔敢。今日有小朋友喺度，千祈唔好誤導咗啲小朋友，叔叔啱啱喺度晨運。」全場隨即爆笑。
軒仔表示十分多謝大家一直以來的支持，亦十分感恩，當晚的觀眾除了美國各地，亦有來自四方八面的朋友，包括香港和廣州，特別是3位廣州「老鄉」更到洛杉磯機場接機，原來當晚3位廣州歌迷亦是座上客，軒仔馬上道謝，更分享一段小插曲，「喺度呀？我有食你送俾我個生果呀，不過食完後個肚有啲唔舒服，你係咪落咗嘢呀？哈哈，講笑。佢好好呀，佢特登洗埋攞嚟機場俾我，喺我瞓咗十幾個鐘、披頭散髮好似隻殭屍咁樣，跟住問我：『可唔可以影張相呀？』真係好體貼呀。」
完show後，軒仔返回酒店途中，於下榻酒店樓下看見一部鋼琴，一時技癢便走上前自彈自唱Minnie Riperton的《Loving You》，期間吸引了一位酒店職員停下聽歌，隨後更加入唱和音，跟軒仔齊齊jam歌。jam歌後，該黑人職員透露自己已經77歲，他亦有將自己的唱歌短片上載到YouTube，並跟軒仔說：「No matter what never stop singing.」為賭城之旅畫上圓滿句號。
