MIRROR成員呂爵安（Edan）日前舉行咗首個個人演唱會《EDAN LUI “IN MY SIGHT OF E” SOLOCONCERT 2023》，他在三場演出中，設有Talk Show環節，他以E.D .Lui身份講出自身及身邊人的現象，以幽默和自嘲方式表達，得到不少讚賞，同時也有網民挑釁，如形容「他唔夠歌開騷」、「靠恥笑隊友博見報」，更有一些惡毒留言，Edan昨日便在IG發表千字文回應，坦言:「藝人都係人，藝人都會有感受，但個世界好似禁止咗藝人有感受/表達感受。」
【新聞有價 記者有格 立即訂閱：https://bit.ly/3wGQh7c】
Edan表示本來想開直播交代心情，但見有人開始擔心他「冇PR」，覺得他會嬲豬，他又指個人唔humble，惟有同白紙黑字同大家分享自己諗法同目的。對於一些Haters對他演唱會的批評，Edan用回他在Talk Show環節中的「偶像天書」金句回應，如「講啱嘅事，做啱嘅事，做要做嘅事」、「感恩感恩」、「應該可以嘅，但我要問下經理人先」及「呢條係一條好好嘅問題」。
對於被指「係咪唔可以俾人話啊」，Edan稱自己是樂意接受善意批評，但「如果係直接msg我一啲人身攻擊，完全扭曲我原意嘅嘢，我就真係想講句有心啦！」他坦言「藝人都係人，藝人都會有感受，但個世界好似禁止咗藝人有感受/表達感受。」因此不能以一句無視便當無事。
他也不認同「偶像、藝人係唔應該反擊」:「我唔認同做藝人就要啞忍、就要硬食，我相信只要你唔係發脾氣，你有道理，你有禮貌地表達，總有明白事理嘅人係會明白你，係會支持你。 咁點解我要咁樣做呢？就係因為我想俾大家知道，做偶像做藝人每日係會suffer啲乜嘢，好多人就係藉住「偶像、藝人係唔應該反擊」哩條規則而為所欲為。」
他直言:「而好多Artist都因為哩條『潛規則』而選擇啞忍，殊不知內心已經千瘡百孔，甚至情緒病！」
最後，他總結這一年發覺，做人要經常開心，事事順利，身體健康，其實唔容易，因每日都有好多不幸事情發生，其實好多人都過得好「苦」。「喺咁嘅前提下，點解仲要想去製造更多嘅「苦」，又何必呢？不如真係試吓放鬆啲，嘗試欣賞多啲or用另一個角度去睇嘢，可能大家都會開心啲。唔鍾意咪唔好睇囉，但冇必要傷害人姐，right？」
「最後我想講，我唔係話個個人都要好似我，用咁嘅方式去表達，每個人都有佢嘅自由同方法同capacity去應對，但我相信每一個人（包括藝人）都係絕對有權去有禮貌地表達自己的。」
