王菀之（Ivana）昨晚再登紅館，完成兩場入行20周年個唱，她透露為個唱瘦了約12磅。而好友張敬軒（軒仔）連續兩晚擔任嘉賓，提到首晚有觀眾在同一環節上叫囂，Ivana表示在台上投入兩人的世界，未有覺得受影響。
【新聞有價 記者有格 立即訂閱：https://bit.ly/3wGQh7c】
一連兩場《王菀之合體演唱會2025》昨晚（23日）舉行尾場，「靈魂伴侶」張敬軒連續兩晚擔任嘉賓，兩人合唱流淚版《下次愛你》。前晚首場演出時有觀眾叫囂，令軒仔搖搖頭疑不滿。昨晚未再有觀眾叫囂，當兩人擁抱時，軒仔亦點頭，還為Ivana抹眼淚。個唱尾聲時，Ivana謂希望下次不用等足11年再開個唱，還祝觀眾大吉大利。粉絲不停拍掌及揼地大叫encore，而Ivana最後自彈自唱《把戲》及獻唱《永遠幾遠》，至晚上11時15結束。
Ivana騷後接受訪問時，坦言希望加場：「我哋唔夠時間，呢個台好複雜，起台綵排拆台得7日booking。我哋諗過加日場，但唔知大家會唔會起唔到身唔想嚟。同埋energy好高，未必唱到日夜場，可能有Part 2 呢？」問到為個唱而減了多少體重，Ivana說：「11、12磅，反而肌肉比例好咗。係教練訓練我嘅目標，旨在健康。」她更自爆治療中心做健身，與伯伯們共用健身帶。
提到連軒仔續兩晚為她站台，Ivana說：「我哋約好唔見、唔綵排、唔講電話，佢一升上台就會諗番過去20年各自為夢想努力，生活中有好多困難要刻服，但都係互相支持。（今晚改咗背對背？）係我idea嚟，因為唔想重複。要同噚（前）晚一樣而又可以保留到。」至於有觀眾於前晚同一環節上叫囂，Ivana 表示未有受影響：「因為互望，好似聽唔到聲音，睇唔到其他人。我覺得冇影響。（今晚觀眾乖咗？）可能佢哋預咗，將空氣凝聚，可能因為咁我喊得勁咗。」
