梁詠琪（Gigi）、王丹妮、周秀娜等人早前為賀歲電影接受泰拳速成班集訓，首次學習泰拳的GiGi坦言有些不習慣，但笑言生活上遇到色狼亦可以保護自己。
梁詠琪從未接觸拳擊運動，今次為電影《臨時決鬥》首次戴上拳套學習泰拳，她表示自己從來都沒有學過打拳：「對於我這位初學者來講確係有啲唔慣，要打人又要俾人打，要適應個節奏，其實都幾攰。」GiGi笑言今次參與速成班，萬一生活上遇到色狼亦可以保護自己：「訓練主要係練習對打時起碼識得保自己，今次其實俾人打多，要練習點樣俾人打，盡量令自己唔好受傷。」
同樣接受密集訓練的王丹妮指自己體能明顯進步，她說：「自己有一段時間沒有爆汗的運動量，想唔到搞笑賀歲片，原來打拳係咁認真。之前跟武指師傅學過少許動作，但今次發覺泰拳同之前所學的有很大分別，有很多步驟要重新再學，但感覺快上手。」
至於有學習kick boxing的周秀娜要演拳王角色，今次拍攝泰拳姿勢、感覺都要好似。初接觸泰拳的她指同kick boxing不同，要預早用一個月時間訓練，又去睇泰拳比賽。她表示踢沙包踢到腳瘀，腳亦練到抽筋，她解釋可能自己打人的時候會好用力，自己擋時就好緊張，不過平時冇事冇幹都會整親，開工前要練好下盤。
有學習拳擊經驗的楊詩敏（蝦頭）表示，教練在其腳上綁上鐵餅，練習從來沒有用過的肌肉，練習時發現自己無力量，非常好笑。蝦頭透露5、6年前有接觸過拳擊，今次都算是最激烈的運動，又笑言今次個角色本身就是吃力。
