歐陽震華加盟英皇半年感刺激 上歌唱節目怕失禮香港演員
歐陽震華去年簽約英皇娛樂後，首次出席公司團拜晚宴。他透露以港劇演員參與內地歌唱節目十分緊張，擔心失禮公司及香港演員，又謂自己唱歌沒有甚麼技巧，只是真心演繹一首歌給觀眾聽。
英皇娛樂昨晚（6日）舉行新春團拜晚宴，主席楊受成率領旗下藝人包括泳兒（Vincy）、周家怡、溫碧霞、曾傲棐、黃明德、洪助昇、黎展峯、海兒、女團VIVA等人出席，星光熠熠。
去年簽約英皇娛樂的歐陽震華，首次參加公司的新春團拜，他說：「好開心，因為我好多年冇參與類似嘅活動，以前喺TVB好似冇呢個環節，團拜就有，但一齊食飯就冇。」歐陽震華指最興奮的是入了新公司後，做了一些他從沒做過的事：「第一年入公司，舊年六月開始到而家過咗半年，我覺得呢半年好刺激，刺激嘅係我做咗啲以前咁多年都冇做過、或者冇人搵我做過、甚至係自己冇諗過我會做到嘅事。」
歐陽震華所說的是參與了內地歌唱節目《聲生不息》 ：「初初我都覺得好似唔係好關我事，呢個節目唱歌嘅個個都係樂壇天花板，但公司話關我事，因為嗰一集係講港劇主題曲，所以好適合我呢個身份上去，因為我實在拍太多港劇啦！」他坦然當時十分緊張：「我怕失禮公司、失禮香港演員。一唱完我問公司同事有冇走音，佢哋話冇，我唱歌冇乜嘢技巧，只係真心演繹一首歌俾觀眾聽。」至於蛇年願望，歐陽震華希望大家都身體健康，日日都開開心心，最重要沒有疾病和戰爭。
而今次領軍當起大師姐的Vincy則說：「我今年比較主動，即刻衝出去派利是，同埋我屬狗，今年行運！哈哈。」日前推出新歌《無糖可樂》的Vincy，在團拜晚宴上全程用「無糖可樂」祝酒，趁機宣傳新歌，非常醒目。
英皇眾同門藝人難得相聚，大家都把握機會合照，去年由英皇電影開拍的《破•地獄》大收1億6000多萬，成香港史上最強電影，老闆楊博士眼光獨到，更即場舉行抽獎環節，氣氛熱鬧。
