究竟一個人係咪真係變咗？最好梗係睇佢做緊咩啦！歌手林二汶喺7.1推出新歌《中華．頌》，仲話一直對國樂有濃厚興趣。其實聽開佢啲歌都知咩料，由近年去TVB台慶、疑似北上參加唱歌比賽、開小紅書，到而家出歌歌頌中華，相信一直係佢fans嘅歌迷都完全心死喇！
【新聞有價 記者有格 立即訂閱：https://bit.ly/3wGQh7c】
林二汶、中華·頌，大纜都扯唔埋？學佢話齋，音樂應該無分國界！林二汶出po話，「一直對國樂有濃厚興趣，也對中國文學文字著迷…中華民族有著千變萬化的歷史，就如人生，本來也是千變萬化，但一切萬變不離其中，根，始終如一。…活著就是見證，見證改變，也擁抱改變。…炎黃萬世流傳成天下，天下，擁抱好年華。」成篇文非常文謅謅，又傳承又美事又炎黃，但非常「不林二汶」，首歌仲要老老套套拉二胡，唱「傳承千古 海納百川」，十足十中國電視劇主題曲。
旁白師最失望唔係佢轉軚轉得快過轉數快，因為係咪表態係一廂情願，而係聽林二汶係想聽文青曲風、聽態度、聽睇法，突然又二胡又中國鼓又中華五千年，就好似入咗間Café但裡面係賣燒味！至於網民對呢首歌嘅反應就話「勁失望 食相難睇」、「做人有必要咁嘔心咩」、「只當自己誤會「最後的信仰」」、「扮乜Q愛國」等等。以上都可以話係一廂情願，正如陶傑提過大家，「如果你識聽我節目，我係隱含溫馨提示，將嗰個黃色情緒投射喺XXXX身上，你會準備好快失望，因為呢啲叫希望越大，失望越大。」
不過相信大家諗唔到快成咁樣，由佢去年現身TVB台慶，解釋音樂應該無分國界，大家仲「仍然」接受。之後，有傳佢北上參加《聲生不息》，嗰時心諗，「唔係嘛？林二汶喎！」到成為TVB《聲夢傳奇》導師，再開小紅書，仍家出《中華·頌》，短短一年內就變成咁，又好難怪大家會有啲Comment。
究竟林二汶《最後的信仰》係咩？真係佢自己本人先知。至於另一個ment，係Supper Moment都出咗25週年活動新歌《共創新篇》，隻歌都好Supper好Moment，同好政府宣傳片feel。只係預見將來林二汶嘅路，會好似Supper Moment咁喺香港樂壇慢慢消失，可能佢喺另一處會大紅大紫，但香港人仲會唔會聽佢啲歌就難講喇。
