樂壇男新人曾傲棐（Arvin）與Lolly Talk成員吳倩怡（Sinnie）日前趁年尾搞小企劃，大玩「2024年度歌曲精選Medley」，為今年做一個紀念。兩人表示傾足兩小時電話，為揀歌「拗爆頭」。
曾傲棐與Sinnie原來入行前已認識，更是一起busking的小伙伴，兩人其後加入樂壇。今年出道Arvin表示年尾又想做些特別小小嘅企劃，腦入面Sinnie就是不二人選，覺得大家以第二個身份再走埋一齊合唱的感覺奇妙。Sinnie亦謂兩人喜歡的音樂類近，今次獲Arvin邀請即刻覺得要大搞，來個「2024年度歌曲精選Medley」。Arvin則指因為今年有不少作品在不同時間為他分擔了不同的情緒，加上今年是首年成為歌手，想用特別的企劃，為自己特別的一年做個紀念。
不過揀歌成為最大難題，二人均表示「拗爆頭」，Sinnie說：「我哋淨係傾揀啲咩歌都傾咗兩個鐘電話。我諗呢一啲歌就係我哋喺嗰一刻覺得好代表到我哋呢年嘅up and downs嘅作品。」她更笑言一次唱那麼多首歌勁開心：「就好似以前唱K去到最後一刻一定要點《勁歌金曲》嗰個感覺……好爽！」兩人均最喜歡《戀愛腦之死》 x 《解咒說明書》那一部份Arvin坦言這是當他跟Sinnie通電話時一個很random的想法：「無論係歌詞上定係音樂上，都好有一唱一和嘅感覺，咁不如我哋疊住唱囉。最後嘅效果我哋都好鍾意，覺得好有趣，可能有時一啲得意嘅創作就係咁即興先嚟得可貴。」
Arvin及Sinnie入行後未有機會合唱，兩人對今次合作大感奇妙，Arvin謂大家各自用不同身份再次合作感覺真的好奇妙，感覺大家對音樂的睇法都成熟，好有一種「隔咗咁耐終於見番而我哋依然係一齊向前進」的感覺！他續說：「尤其見到Sinnie女團或者其他嘅發展都好成功，有一種感覺，覺得自己都要加把勁啦。又咁啱近年尾，今次嘅合作係為我帶嚟咗一啲小感動同埋溫暖。」
