MC張天賦日前推出以「人生」為主題的新歌，他憶述入行曾做過不同工作的日子，包括抬冷氣及街站銷售員等。他坦言曾遇上懷疑人生的問題，但因為他是一個活在當下的人，可以在微細的地方搵到快樂。
MC張天賦今年3月30日出道四周年，繼《說謊者》後，日前推出2025年的第二首主打歌《懷疑人生》，內容有別以前聽眾耳熟能詳的情歌，以「人生」作為主題，帶出許多人甚至是MC自己心中「懷疑人生」的想法與無力感。
MC曾分享他於出道前為生計而嘗試不同類型工作，如安裝冷氣、餐廳廚師、侍應及電話月費推銷員等等，恰巧非常貼切新歌主題，故決定MV故事參考他出道前的真實故事。MC說 :「安裝冷氣係我返過嘅其中一份工啦，好記得當初係比MV入面辛苦好多，而且多數做都係一啲唐樓或者House（別墅），上去三樓搬吓嘢，洗吓冷氣同換冷氣，搬搬抬抬之後就會發覺自己背脊多咗好多傷痕。」他亦透露除了做過安裝冷氣外，亦做過餐廳，做過介紹街頭推介電話plan：「我覺得呢個工作（現實中）比 MV入面輕鬆嘅，因為一來其實如果搵街邊嘅人係可以攞到唔同嘅優惠，同埋佢哋之間亦有好多你唔知嘅程序上嘅玩法，所以基本上坐喺度都會有人埋嚟咨詢，就唔洗好似MV入面咁Sell客，除非你要追quota啦，不過平時都要（承受）風吹雨打。而餐廳就係因為當時喺一間餐廳唱歌，佢同我講唔夠人喎，你會唔會入嚟幫埋手呀？所以平時會幫手煮意粉、炸雞翼同炸薯條，夠鐘就出去唱歌，唱完歌就會返返入去幫手煮下意粉。」
問到MC是否最拿手煮蟹肉忌廉意粉？MC則說 其實餐牌上面食物尚算容易製作，但若問到自己最喜歡的食物應該算是意粉。他續說:「如果純粹為興趣的話，我都想鑽研吓煮嘢食，甚至其實我都幾享受餐廳要煮嘢食，好多嘢要同時處理嘅嗰種繁忙。」
歌曲講述在成長時遇到很多價值觀的衝擊，令我們會懷疑人生種種的事情，MC亦坦言一定有遇過這些問題：「因為你必須要喺實際同埋夢想中揀一項去實現，好難兩全其美，所以我當時嘅決定，其實都唔係一個決定，我覺得同我性格有關 ，因為我係一個活在當下嘅人，我可以喺微細嘅地方搵到快樂，所以即使當時好辛苦，我都覺得開心又或者即使幾辛苦都好，busking之後如果我可以買到我想要嘅咪或者喇叭，有人聽我唱歌就開心。」他亦坦言成為歌手前的階段是他人生中「最差」的階段，因為曾經欠交租金及各樣繳款，需要同時做很多兼職賺錢，真的很不容易，現在回望返都真是盡在不言中。
