唱作歌手黃明德全新單曲一改以往青春清新形象，以強勁搖滾曲風直插社會虛偽現象。他又自爆曾被朋友出賣，將責任推卸咗落他身上，難怪他唱得有火。
黃明德（Dark）新歌《大鬧說謊城》今日推出，新歌靈感來Dark對現實社會的不滿：「攤開報紙，扭開電視，打開電話，接收過萬樣資訊，都唔知邊句真邊句假。」所以他便以最直接的方式，以搖滾音樂來表達對這個「說謊城」的不滿。作曲及編曲部份由Dark親自主理，又找來小克填詞，當中的「但大話總喜歡冚一個大話，利疊利的風險知道嗎」一針見血地諷刺社會謊言連篇的荒謬現象。
Dark更自爆曾被朋友出賣，難怪唱得有火：「最深刻係俾朋友背叛，佢做錯一啲事，但將個責任推卸咗落我度，我就俾人責備。」提到「大話」，Dark坦言自己性格直腸直肚，就算遇上不快事，亦會直接說出來，並非一個經常講大話的人，但最大的一個大話是跟自己說：「有陣時唔開心嘅時候會呃自己冇事，但其實去到最尾嘅後果就係會將啲唔開心嘅嘢儲埋一齊，然後一次過爆發，所以一定要正視自己嘅情緒。」
新歌轉玩重型搖滾，有別於Dark一直以來的清新校園曲風，Dark坦言搖滾更啱口味：「其實我由細到大都接觸好多重金屬嘅音樂，好鍾意搖滾風，所以對我嚟講，搖滾嘅歌係容易過之前嗰啲青春輕鬆曲風。之前出過咁多首歌入面，我覺得最難駕馭係《留班同學》、《沒有穿校服的日子》嗰期比較輕鬆嗰啲。」
