茹素多年的敖嘉年透露當初因愛貓離世而慢慢轉食素，指自己茹素後，發覺連運氣都有改善，除做主持外，上年更再拍攝劇集。
敖嘉年接受HOYTV主播俞詠文（Angela）訪問，一起品嚐新春創意素菜。當中素菜館還增添了充滿新意的陳皮咖啡及玫瑰朱古力，充滿Fusion 的感覺。
嘉年表示自己已茹素十多年：「當初係因為我啲愛貓離開咗，令我非常心痛！可能係呢個契機，我就諗吓不如試吓唔好再食動物啦！ 初時都係一步一步嚟，唔好一下就cut曬，咁樣會好易放棄，每個月嘅初一十五，又或者每個星期搵兩日食素，循序漸進就最好。好似我以前都係好鍾意食叉燒嘅，但係而家呢種新派嘅煮法，連素叉燒都像真度好高，加埋碗白飯就不得了喇！」
嘉年亦笑言茹素後運氣亦相當好：「講真托賴我不嬲都覺得自己運氣唔錯嘅！而上年亦都有唔錯嘅工作量啦！其中就係幫HOYTV拍咗首個原創劇《我愛九龍城》，同陳家樂，泰臣合作，講一個關於麻雀館嘅故事，有笑有淚，另外繼續拍攝大家都好鍾意嘅《健康關注組》，大大話話都拍咗成11季㗎喇！長知識之餘，亦認識到唔同界別嘅醫生。」說到蛇年展望，嘉年希望HOYTV可以繼續開劇，讓全球都可以看到充滿香港人情味的劇集。
