MIRROR年底推出壓軸單曲《12》，作為聖誕禮物做畀Fans。呢份成軍第三年嘅禮物得來不易，坊間越嚟越多傳聞話MIRROR可能會解散、成員單飛等，但12塊鏡，邊有咁易打得爛？有份幫《12》填詞嘅ViuTv總經理兼「鏡爸」魯庭暉，最近接受傳媒訪問，話本身考慮過單數組團，最尾湊夠12人都只因「唔捨得」。組團都講到咁，又點會捨得拆散佢哋呢？
魯庭暉喺訪問入面，仲大爆組合命名「MIRROR」嘅原因。事源佢當年喺皇仁參選學生會，另一個候選內閣「MIRRORS」喺選舉論壇嘅表現令佢印象深刻，覺得佢哋幾有創意，所以幫鏡仔諗名嗰陣就聯想起呢個名。最後魯生嘅建議無人反對，「MIRROR」就此誕生。
魯生亦都形容《造星》節目就好似「訓練班」一樣，當初其實都無諗住特別簽幾多人同簽幾多個，只係後來發現節目團隊各自都有鍾意嘅參賽者，所以就諗住「不如組一個團，容易組織」。魯生又表示唔係想學日韓組合「靠人多」，只係因為「唔捨得，唔想自己後悔」，仲直言「飯錢乘五同乘十二係兩回事」，就算諗過單數組團排陣都會易啲，但加加吓就變成12個人。
MIRROR呢年嘅爆紅眾所不及，但魯生其實好擔心MIRROR唔紅，仲預咗「所有嘢都有佢紅同唔紅嘅時間」，所以佢永遠都係諗「到底呢一步要做啲乜嘢」，無論咩情況都要有個Plan。鏡仔踏入爆紅階段，魯生就坦言「plan過收埋佢地」，畀成員接受訓練，令新作品推出時大家都可以見到佢哋有進步，情況就類似韓團Come Back一樣。
至於聽晚就係《全民造星IV》嘅決賽，魯庭暉否認女團名單屬內定嘅講法，話當日選拔之後佢哋掛住「叫外賣A、B、C餐」，根本無傾到任何結果，唔知點解外界會傳出女團內定。講到呢度，大家聽晚記得睇《造星IV》決賽，支持1號Ivy So！！！！
