容祖兒因病延期3次的《ANOTHER SIDE …… JOEY•MY SECRET•LIVE》昨晚 （1號）終於再度復演，病癒後祖兒狀態大勇，加上感受觀眾的關懷，讓她愈唱愈好，最後她感動對大家說：「Doctor Stage 把我治癒了！我可以站在這裡，接受到你們給我的愛，真的藥到病除！」昨晚英皇娛樂主席楊受成先生夫人，祖兒好朋友蔡卓妍均有到場打氣。
昨晚開場不久，祖兒跟大家打招呼：「各位朋友，大家好嘛？ 本來預定一些開場白，但今日唔講啦。因為我好想藉這個機會，同大家講一聲抱歉！因為之前唔舒服，令大家要延期。雖然我知道，在座每一位朋友，都係願意等待.....」觀眾即報以大叫支持及掌聲、歡呼聲， 祖兒說： 「今日來到演藝都係最錫容祖兒嘅人，因為你哋對我嘅愛，我同自己講，我今日一定要振作，一定要做好佢！」台下歡呼不斷，祖兒開心道：「真係好好反應，你哋反應愈好，我把聲就愈好，好神奇，你哋係醫生，我係病人，掌聲、歡呼聲就可治癒我！」
演出至第三部分，祖兒對觀眾說：「把聲好神奇，真係愈唱愈開....可能因為又跳又唱，出一身汗，水尾感冒最煩人，希望今日冇令大家太失望.....」觀眾報以熱烈歡呼聲並大叫「演出好好」。
祖兒有感而發，指今年是她入行第24年，15歲參加歌唱比賽，到現在真的可以說是中年好聲音，自己好開心找到終身喜歡的職業，同時可以一直保持一個純綷的心：「無論站上台做歌手，或者坐台下做觀眾，我都好投入，因為我好鍾意香港流行曲，我聽香港流行曲長大，這些音樂一直滋潤我，由細到大都有好多歌陪伴我行人生路，我好希望人生裡面可以唱好多歌，無論Side Track或主打，只要有一首歌可以陪伴大家，都係我福氣。過去十日，對我實在係太漫長，冇人希望病， 這幾年已經教識我們，好多事不可以好好預計。計劃趕不上變化....有幾日，我病到覺得自己迷失，好沮喪，冇晒信心，冇晒心機，唱唔到歌，作為一個喜歡表演的人，希望每一次都可以俾到十足水準，但係不停延期，我覺得好sorry，覺得身體好唔爭氣....」
她稱直至上星期有一晚，今次演唱會導演彭秀慧她我傾偈，表示發現她已經魂魄唔齊。「佢同我講，其實好簡單，我哋鍾意表演，未到最後一刻，未到觀眾話你唔好唱，你都應該繼續努力唱，觀眾知道你病緊，會體諒你，觀眾只係想睇下你，見下你，只要見到你開開心心唱歌，同佢哋講嘢已經足夠。佢話我知冇人想病。今日我企返係到，真係好多謝彭秀慧心靈上俾咗好大鼓勵我，經過今次，我人生又豐盛咗，唱歌可以再好聽啲，舞台就係我底線、只要我可以企係舞台，我可以接受到你哋嘅愛，真係藥到病除。」
祖兒再送上《男朋友與歌》，表示未必是最好狀態，但絕對表達到她對音樂的愛。完騷後，祖兒表示，未來時間要好小心保護身體，希望狀態可以更好：「真係好鍾意企係舞台上感覺，雖然未係100分，但係擁有100分觀眾，係我福氣，我會加油，咁多愛一定可以為我注滿動力，愈做愈好，多謝大家。」
而昨早她又於IG上貼出媽媽煮的午餐，感謝道: 「我媽媽每天一起床，牙都未擦頭髮蓬鬆睡眼惺忪嘴角仲有口水漬地為我精心準備的午餐，從band rehearsal 那天開始風雨不改，我媽就是這樣心無旁鶩義無反顧一心一意地照顧着我。說真的，這是我吃過全世界美食之後我最喜歡的米芝蓮。
我能夠在每一舊蓮藕，每一舊苦瓜，每一啖冬菇，每一口濃湯裏面感受到媽媽用他獨門的方式為向我示愛。一切都在心中，接受了所有愛之後，我還是希望她能好好照顧自己不要太辛苦，她的女兒已經從她悉心愛護下長大，她的傻女兒懂得面對困境，勇於接受不完美，最重要是她相信明天會更好。如果這個世界沒有她的愛，這一定是另一個故事。再過去十天，我嘅人生閱歷又豐富了，在迷惘沮喪過後我更加堅定地相信舞台便是我的良藥。我只要有勇氣站上去，我就會一天比一天好。舞台，是我的底線，是我的家，是我核心，我和舞台的關係好比戀人，它讓我變得更好活得更好，更願意付出。力去力還，感覺各方好友的支持。盡做！」
