愚人節大家都攞正牌整蠱人，Edan（呂爵安）@MIRROR都唔例外，仲連續玩「爵屎」（Edan粉絲的稱呼）兩次添。不過睇嚟班粉絲仲非常受落，新歌《Elevator》嘅MV一推出，個半鐘已經累積咗12萬次觀看次數。
Edan今日凌晨喺Instagram Stories宣佈，今晚8點會推出新歌《Elevator》嘅MV，叫粉絲8點鐘睇。一眾「爵屎」就「擔定櫈仔」睇MV首播，點知條片只得15秒，中途跳出隻嘩鬼，原來一切都係愚人節嘅玩意：「愚人節快樂！ 8點3再返嚟睇啦！」久候嘅粉絲就無奈等到8點15分，點知都只係出另一條teaser。但今次片尾終於見到主角Edan，佢奸笑話：「愚人節快樂！ 8:30再返嚟睇啦！」
去到8點半，終於有新MV睇。Edan即刻留言「耍冧」，祝大家愚人節快樂之餘，「希望大家喜歡同唔好嬲我啦」。「爵屎」當然冇嬲，只係「希望Edan唔好再呃我」，有人仲話「俾（被）玩左（咗）兩次依然都係開心嘅」。有身處海外嘅粉絲特登清晨5點鐘睇MV，雖然對被玩感到無奈，但都大讚MV精彩、豐富。
咁有膽色玩粉絲兩次，難怪媒體人Terry都喺fb page都話，「玩法當然係勁，但要好紅好受歡迎先Carry到」，「真係星先做得到」。
