張敬軒昨晚（20日）於灣仔會展舉行11場《REVISIT張敬軒演唱會》，頭場為歌迷會專場，軒仔特別為歌迷揀選他們心水投票曲目，更揚言昨晚唱的歌，可能之後不會再唱，錫歌迷錫到出晒面，令粉絲開心到飛起。軒仔新染了一頭金髮，開場一口氣又跳又唱四首快歌，包括《Deadline》、《Sweet Escape》及《Stop the Time》，全場已經起身站立跟着他又跳又唱，high爆會場。
【新聞有價 記者有格 立即訂閱：https://bit.ly/3wGQh7c】
軒仔在演唱會中透露：「今年是365日內第27場演唱會，也是過去3年幾疫情中，自己開過總共第三次的演唱會，考驗一次比一次難，因不斷在band房、或在不同環境中，部份人有兩條線出現，主辦單位及導演、監製，為保障我今晚可以平安唱歌畀大家聽，我冇同band一齊綵排過，今日先係第二次同樂隊夾，所以多謝樂隊樂手包容。在疫情挑戰好多唔可能嘅事，今次演唱會當中亦都有一些道具，或者衫，甚至特別的arrangement，都無法如期帶上舞台，所以要多謝呢個演唱會入面臨危受命嘅好多個造衫、道具同工程嘅同事！」
軒仔練了兩首歌自彈自唱，分別是《靈魂相認》及《遙吻》，「鋼琴王子」形象近年少於舞台上出現，唱到《懷舊情人》時，軒仔笑言自己一直有個「男團夢」，奈何條件不足：「以前後生都好想做個idol，可惜我唔係好具備做idol嘅條件，所以今晚我決定，反正開完今次都唔知幾時再開，決定盡地一煲，做齊自己覺得最起雞皮嘅動作，希望大家圓一圓我呢一個男團夢，比我感受睇韓星時嘅尖叫。 」
歌迷即刻瘋狂叫，軒仔又說：「呢幾年香港樂壇，對於我呢一輩歌手來講好大衝擊，因為有時喺頒獎禮我望隔離，我都大佢哋一截，同年出道嘅歌手，有41個單位，但係慢慢好似……有種剩返自己嘅感覺。所以我好感恩有一班好錫我嘅fans，每一次當我想去突破時，多謝大家比我能量，令我內心十分十分之被厚愛嘅溫暖，明明有好多小鮮肉，有新鮮感嘅artist，但係大家依然會選擇張敬軒，去聽我嘅歌，去IG點上一個like，好多謝你哋嘅呢一份情意。」
出名愛錫粉絲的張敬軒昨晚更「軒公開庫」送大禮，獎品非常精彩，三等獎是兩張價值2000元的連鎖米線店現金券，更笑說：「限兩日內食晒，邊個腳板底有粒墨，我就送畀佢！」令歌迷笑到肚痛。 二等獎是電動牙刷兩支、頭獎更是他代言的手機！
全場歌迷為爭獎品，叫聲震裂會展，氣氛非常歡樂。由於昨晚是歌迷場，每位歌迷僅得一張「獨家村」座位，他又笑謂：「一個人嚟，可能兩個人走，呢度有冇單身人士，我想睇吓有冇啲啱我嘅。」期間有歌迷趁機送上自製巨型蒸籠，籠內有兩個包及長條閃燈包，搞笑又三級，貼上「大精籠」、「精精日上」大字，軒仔笑罵：「你呢個咩嘢？似龜板多啲，你太百厭……」
昨晚由於歌迷太熱情，軒仔最終安歌三次，先是送上《賽勒斯的愛 》、《叮噹可否不要老》及《雪花抄》，歌迷再狂叫安歌，軒仔又再出場，唱了《悲劇人物》及最近大hit的日文歌《First Love》，螢光幕上顯示廣東話譯音的歌詞，相當搞鬼，歌迷可以跟住唱。完場開大燈後，歌迷繼續不肯離開，軒仔又再出場獻唱了《老了十歲》，大家才肯回家。
