「人們剖析我的臉 不發一語 呼氣吸氣 便引動謠言」（《黑之呼吸》）、「響起節奏 我是隻瘋狗」（《虎道門》）……坊間對Anson Kong@MIRROR嘅印象，好多都依然停留喺「叱吒黑面」、「ViuTV衝動吳卓羲」，但其實AK唔止係一名義氣仔女，仲係個乖乖仔嚟㗎～
有鏡粉喺Facebook群組「Mirror HK fans?We are one and all」轉貼一名錄音室老闆Lawrence嘅文章，內文指有位清潔公司老闆娘到其公司報價，咁啱見到牆上有佢同「某香港男天團」其中一位成員嘅合照，就話「呢個係我個仔」。Lawrence聽到之後就答：「又會咁岩？犀利喎，兒子咁出名又生性，你真係有福呀。」點知老闆娘一臉認真咁講：「有幾犀利呀？你話喇。」搞到Lawrence一時之間都唔識點答……
呢句聽落好似有啲嫌棄，但其實老闆娘當刻望住幅相，流露咗個難掩內心滿足之情嘅窩心笑容，再講咗句「不過佢真係好乖好努力」。Lawrence喺文章到讚呢位媽媽「不易自滿和不會炫耀」，所以相信喺佢嘅囝囝內涵都唔會太差。
雖然呢篇文本身無開到「天團成員」嘅名，但轉貼文章嘅鏡粉就講出大家心中所想，話AK曾經講過因為父母工作經常要搬運重型工具，唔想佢哋咁辛苦，所以要努力賺錢養家，所以「大家都估到應該係淸潔公司太子爺AK」。有唔少生粉都係文章下面留言「AK世一」，又讚江媽媽教導有方，令AK而家成為謙卑有禮嘅「暖男」副隊長。
